Ayera 7 di februari, minister demisionario di Asunto Economico, Comunicación y Desaroyo Sostenible, Geoffrey Wever a reuni cu e delegacion di “United Nations Economic Commission for Latin America and the Caribbean” (UN ECLAC) den cuadro di ehecucion di un estudio riba diferente riesgo, obstaculo y oportunidad di e sector di FINTECH y evaluacion di e impacto di “Blockchain Technology” y “Crypto Currency”.
Ta premira pa ricibi e resultado den luna di april, cu lo forma e base pa implementacion di maneho pa pusha e desaroyo di e sector FINTECH y diversifica Aruba su economia.
FINTECH – of Tecnologia Financiero — ta referi na tecnologianan innovativo y solucionnan digital cu ta wordo aplica den e sector financiero pa haci servicionan financiero mas eficiente, accesibel, sigur y facil pa usa.
Den e siman di 3 pa 7 di februari e delegacion di UN ECLAC a reuni cu diferente partners manera Banco Central di Aruba, Camara di Comercio, ATIA, Setar N.V., Cybersecurity Center of Excellence, Insurance Association of Aruba, Aruba Bankers Association, Digicel, Directie Telecommunicatie Zaken, Qredits Aruba, Gamma IT y diferente personanan clave den e sector di FINTECH.
Meta di e reunion aki tawata pa haya un bista realistico di e posicion actual di Aruba den e sector FINTECH pa asina tin mas conocemento di e impacto economico di tecnologia innovativo y solucionnan digital nobo den e mundo comercial impacta pa cambio y desaroyo continuo. Esaki ta un proyecto cu a inicia mas cu un aña pasa y ta den desaroyo.
“UN ECLAC ta premira di entrega e resultado den luna di april. E resultado lo ta e base di un plan di implementacion pa pusha, unda posibel, e desaroyo di e sector di FINTECH y asina yuda crea un otro sector economico”, segun minister Geoffrey Wever.
Minister Geoffrey Wever ta gradici Departamento di Asuntonan Economico cu ta guia e proceso di e estudio relevante pa desaroyo economico di Aruba.
