Recientemente, Colegio di Supervision Financiero (CAft) a publica un carta dirigi na presidente di parlamento di Aruba, Sra. Gerlien Croes, tocante e tardansa den proceso di presupuesto 2025. Segun presidente di parlamento a informa mediante un comunicado di prensa, motibo di e atraso ta cu Gobierno no a manda un Nota di Contestacion riba e presupuesto na Parlamento.

Manera Bon Dia Aruba a reporta e siman aki, presidente di Colegio di Supervision Financiero, Lidewijde Ongering a resalta e hecho cu no a aproba presupuesto 2025 den Parlamento, y ta adverti riba e consecuencianan fiscal y legal di esaki.

“Ley Temporal di Supervision Financiero di Aruba (LAft) ta stipula cu Aruba mester entrega e presupuesto aproba pa e proximo aña fiscal na e Colegio di Supervision Financiero (CAft) pa conseho prome cu dia 15 di december. Esaki ta sigura cu un presupuesto legalmente valido ta na vigor for di dia 1 di januari,” Ongering ta menciona den e carta. Sinembargo, e ta nota cu te fecha di e carta, 3i di januari, CAft no a ricibi e presupuesto aproba pa 2025. E carta ta nota cu segun Articulo 13, paragraf 1 di LAft, a informa Conseho di Minister di Reino di e asunto aki.

“Ausencia di un presupuesto aproba no ta afecta solamente e autoridad presupuestario di Parlamento, pero tambe por tin consecuencianan financiero mas amplio, manera restriccion riba drenta den compromisonan financiero nobo. Esaki ta preocupante, ya cu Aruba no lo por haci prestamonan nobo mientras ta enfrenta un obligacion di pago di un debe di aproximadamente Afl. 600 miyon na 2025,” Ongering ta adverti.

“Adicionalmente, dia 1 di januari 2025, sin intervencion parlamentario, a implementa un cambio mayor den impuesto riba entrada y salario (resultando den un perdida structural di entrada di Afl. 50 miyon),” e carta ta menciona, notando cu Aruba tin “suficiente capacidad pa implementa un medida asina.”

Sinembargo, ta nota cu pa por garantisa un proceso presupuestario bon organisa, ta preferible pa entrega e implicacionnan financiero di e cambio aki na Parlamento mediante un Nota di Amienda. “Minister di Finanzas y Cultura a indica cu ta tumando stapnan pa atende e asunto como parti di e discusion di presupuesto den Parlamento.

“Den e contexto aki, CAft ta resalta un gap potencial den legislacion cu por mina politica fiscal sostenible. Cambionan di politica cu impacto financiero, tanto den termino di entrada como gasto, mester keda aproba pa Parlamento di antemano.

“E marco legal aki ya ta regula e proceso di aprobacion pa compromisonan di gasto. CAft ta conseha pa evalua con e rekisito aki tambe por ta hancra den legislacion pa cambionan di politica cu tin consecuencia financiero riba entrada. Esaki ta un problema structural y ta independiente di e discusion di presupuesto 2025.

“Den añanan recien, Aruba a tuma stapnan significante pa mehora su proceso presupuestario. Ta crucial pa continua e progreso aki y sigura un proceso presupuestario ordena. E formacion di un gobierno nobo no mester causa retraso,” e carta ta conseha.

Ademas, ta nota cu unabes cu aproba e presupuesto, “e gobierno nobo por implementa e consecuencianan financiero di su prioridadnan di politica a traves di e prome presupuesto complementario.”

Pa finalisa, CAft ta indica cu ta considera cu ta “esencial pa e presupuesto keda aproba lo mas pronto posible, pero no mas laat cu dia 21 di maart 2025, y ta urgi Parlamento pa duna prioridad na su discusion.”

Reaccion di presidente di parlamento

Bon Dia Aruba a tuma contacto cu presidente di Parlamento, Gerlien Croes, pa pidi comentario riba e carta di CAft. Mediante un comunicado di prensa, Croes a contesta lo siguiente:
“Pa medio di e comunicado aki, Presidente di Parlamento ta informa cu dialuna dia 3 di februari 2025, Presidente di Parlamento a dirigi un carta na Gobierno di Aruba y cu un copia na e Colegio di Supervision Financiero CAft cu e recordatorio na Gobierno di Aruba cu e Nota di Contestacion (Nota naar aanleiding van het Verslag) riba e presupuesto 2025 no a wordo ricibi ainda na Parlamento di Aruba. Sin e nota aki e proceso di tratamento di e ley regardando presupuesto di pais Aruba pa aña 2025 no por wordo inicia.”