(AP) — Presidente di Colombia Gustavo Petro a ordena e compania nacional di petroleo Ecopetrol pa cancela negociacion cu un compania Mericano cu lo produci ariba 90,000 bari di petroleo pa dia, debi na preocupacion ambiental.
Den un discurso transmiti pa television nacional, Petro a bisa cu el a opone e extension reciente di un acuerdo entre Ecopetrol y Occidental Petroleum (Oxy), pasobra e ta envolvi extraccion di petroleo via ‘fracking’, un tecnica controversial pa extrae petroleo y gas for di ’shale rocks’ cu ta ser critica pa grupo ambiental.
“Mi kier e operacion aki ser bendi, y cu e placa ser inverti den energia limpi,” Petro a bisa den un reunion cu su gabinete cu tabata transmiti en bibo via red social. “Nos ta contra fracking, pasobra fracking ta mata naturalesa y ta e morto di humanidad.”
Ecopetrol, cu ta controla pa gobierno di Colombia pero tambe ta riba e lista di New York Stock Exchange, a mira su shares subi cu 2 porciento diamars despues di anuncia nan acuerdo cu Occidental. Pero, e shares a baha un poco despues cu Petro a pidi pa cancela e acuerdo.
Colombia a nenga di aproba proyecto di fracking den su teritorio, aunke esaki no a blokea Ecopetrol pa tuma parti den negociacion di fracking pafo di Colombia.
Ambientalistanan ta argumenta cu fracking por contamina fuente di awa y causa temblor.
