Minister Geoffrey Wever: Alternativa di subsidio pa aumento di prijs di gas ta un decision pa gobierno nobo

Recientemente Arugas a anuncia un aumento den prijs di gas domestico cu lo drenta na vigor entrante 15 di februari. E noticia aki a causa un malcontento den comunidad cu ya caba ta expresa e dificultadnan cu nan ta enfrenta pa motibo di costo di bida halto na Aruba.

Segun e comunicado di prensa ta indica a tuma e decision aki despues di a ricibi aprobacion oficial di Gobierno di Aruba na comienso di februari di e aña aki y ta conta solamente pa clientenan domestico. Prijs di gas pa clientenan comercial no tin cambio.

E comunicado ta sigui splica cu e prijs di gas domestico ta regula y durante mas di 35 aña, te cu aña 2022, e unico aumento den e prijs tabata pa motibo di e introduccion di impuesto BBO, BAZV y BAVP. Segun Arugas, a indica constantemente na Gobierno di Aruba cu e prijs regula no tabata cubri e gastonan asocia cu importacion y distribuicion.

Na 2022 a aproba e prome aumento di prijs pa e cilinder di 100 lbs, aumentando esaki na 60 florin. Pero segun e compania asina mes no tabata logra cubri e gastonan.

Aworaki, despues di combersacionnan cu a tuma luga, Arugas a haya aprobacion pa aumenta e prijs na 80 florin pa cilinder di 100 lbs, un aumento di 20 florin. E prijs nobo aki ta conta pa e prome cuater cilinder. Cilinder cinco y seis lo tin un costo di 100 florin y si surpasa seis cilinder, lo paga e prijs comercial cu ta vigente na momento di compra.

Despues cu e noticia a bira conoci, e noticiero local Noticia Cla a indica cu prome minister demisionario Evelyn Wever-Croes a confirma cu Conseho di Minister lo a pidi minister Geoffrey Wever pa reconsidera su decision pa aproba e aumento di prijs di gas.

Segun e portal e mandatario a indica cu Conseho di Minister a pidi minister Wever pa sigui dialoga na mesa y explora otro alternativanan en bes di aumenta e prijs, cual lo tin un efecto grandi den comunidad, specialmente esnan di menos recurso.

E noticia no a ser bon ricibi den comunidad. Riba rednan social varios ciudadano a expresa nan disgusto pa e aumento aki y a expresa nan frustracion teniendo na cuenta cu hopi famia na Aruba ya caba ta lucha pa por cubri tur nan necesidadnan. Un aumento mas ta nifica un presion mas riba e personanan aki.

Bon Dia Aruba a combersa cu minister Geoffrey Wever tocante e situacion ken a splica cu en berdad, Gobierno di Aruba ta regula e prijs di gas. Na varios ocasion Arugas a indica cu nan ta mira e necesidad pa aumenta e tarifa di gas domestico.

Manera ya caba menciona, e prome aumento cu a ser realisa tabata uno di 15 florin y aworaki, despues di dialogo, a aproba e aumento di 20 florin pa e prijs di gas domestico cu lo drenta na vigor entrante 15 di februari.

El a indica cu a pesar cu tin un aumento di prijs, e ta un desaroyo cu ta ser afecta pa hecho cu internacionalmente prijs tambe ta aumentando, locual ta aumenta e costo di produccion pa e compania en cuestion, y pa e motibo aki aumento di prijs tabata necesario.

Inicialmente Arugas a pidi pa un aumento mas halto, pues tabata kier aumenta e prijs na 90 florin pa cilinder di 100 lbs, pero minister Wever a indica cu a logra yega na un acuerdo pa un aumento di 20 florin pa aworaki, poniendo e prijs nobo na 80 florin.

El a remarca cu e discusion aki ta uno cu andando desde cu el a bira minister di Economia. El a indica cu e aumento di prijs aki no ta beneficia e compania, pero ta pa trece e compania na un nivel cu por “break even” en bes di keda den perdida, manera cu tabata pa añas caba. Si lo a sigui asina lo por tabatin posibilidad di pone den riesgo e suministro di gas pa Aruba.

Minister Wever a sigui splica cu en berdad Conseho di Minister a pidi su persona pa reconsidera e decision aki y pa sigui dialoga na mesa y explora otro alternativanan en bes di aumenta e prijs.

E mandatario a splica cu na e momentonan aki, teniendo na cuenta cu gobierno actual ta un gobierno demisionario, e no ta na su luga pa haci esaki. Alternativa di bin cu un subsidio di un forma cu lo por cubri e aumento di prijs por ta un posibilidad, pero no ta un opcion pa tuma e decision aki bou di un gobierno demisionario.

El a indica cu esaki ta un alternativa cu un gobierno nobo lo por explora y ta un alternativa probabel ya cu e prijsnan di gas riba nivel internacional ta aumenta, cual na su turno lo tin efecto riba e prijs di gas na Aruba. Un subsidio pa yuda cubri e aumento aki lo trece alivio pa comunidad.

Di otro banda, e noticia aki a ricibi critica no solamente di pueblo riba medionan social, pero tambe di otro politiconan. Parlamentario y lider di fraccion PPA, Otmar Oduber, a indica cu e aumento sorprendente aki ta mustra cu gobernantenan, den e caso aki el a referi na minister di Economia, no tabata sincero cu pueblo. “Esey ta loke mas ta resalta, un persona cu ta fungiendo como minister di Economia, dos luna pasa tabatin eleccion y no a notifica e pueblo aki cu ta bay aumenta gas,” el a indica.

Segun e parlamentario un noticia manera aumento di prijs di gas cu 35% no ta algo cu ta haya sa ayera of recientemente, pero ta algo cu probablemente tabatin conocemento di dje di prome cu eleccion.

“No ta cuestion di ataca e persona, ta cuestion di e hecho, ta cuestion con bo por tuma un pueblo haci, nos tur a bay un eleccion y a mustra riba e hecho cu costo di bida ta haltisimo na Aruba. Den henter e discusion na ningun momento a bisa cu tin mas medida na caminda,” Oduber a señala.