“Cada soño y cada meta, tin un sacrificio su tras pero e resultado ta algo bunita”; Chosen Melody ta un soño cumpli y muestra di e talento abundante cu tin na Aruba

For di chikito nan tabatin 2 soño; biba banda di otro y tin un proyecto musical hunto. Awe, nan ta bisa cu gratitud na Dios cu ambos soño a ser cumpli. Bon Dia Aruba a sinta cu Richelina De la Cruz, Ruauny Paula y Luis Rodrigo Moreno, integrantenan di e grupo Chosen Melody y kendenan a traha duro pa nan deseo di comparti nan talento bira un soño converti den realidad.

Ruauny ta naci na Hulanda pero a crece na Aruba for di chikito y ta considera su mes un Arubiano. Semper e tabatin perseverancia y tabata un bon studiante cu semper a gusta di tanto un ambiente social, como un ambiente keto den priva unda e por a pensa y expresa su creatividad pa medio di skirbi. Aunke mas adelante el a enfrenta algun dificultad, nunca el a rindi y a sigui lucha, te cu el a haal su bachelor den finanzas. Awo e ta senior accountant y aunke esaki ta algo cu e ta haci cu hopi amor, toch e ta keda algo cu no tabata su pasion.

Ora cu e tabatin alrededor di 12 aña, el a cuminsa sinti e deseo di pertenece na algo. Durante e temponan aki tabata e periodo unda varios diferente grupo a cuminsa forma den hobennan en general y pa medio di conoce Dios, tur su necesidadnan a ser supli y el a yega na un punto unda e por a sinti su mes na cas.

Richelina ta un persona sumamente bondadoso y cu un curason yen di amor. Un parti hopi importante di su identidad, y tambe di tur esnan cu ta forma parti di e grupo aki, ta nan creencia den Dios y e amor cu nan tin p’e. E ta conta cu “na Republica Dominicana ta unda mi por bisa cu, ta unda mas mi a cuminsa siña kico ta en realidad alaba cu tur bo curason.” Danki na e experiencianan biba den e pais e por a siña mas di musiconan y personanan cu ta canta, incluso “hopi amistadnan cu mi tin aworaki nan ta hopi conoci.”

El a conta cu tempo e tabata biba na Republica Dominicana, e tabata skirbi cantica pa un artista Dominicano, “incluso el a pega cu un di e canticanan. E ta conta cu personalmente, e ta desahoga pa medio di skirbi cantica y den e tempo aki e tabata skirbi cantica cu no tabata conta cosnan bunita, posiblemente a causa di e temponan cu e y esnan cercano na dje tabata bibando den e temponan aki.

Na e momento ey, el a haya e sentimento di kier a trece esaki na Aruba y duna e isla un grupo cu tambe por ser reconoci rond di mundo, “y no cu nos ta haci’e pa fama, pero na Aruba tin hopi talento,” y esaki ta e talento cu Chosen Melody kier trece dilanti y comparti cu mundo.

Luis Rodrigo ta un persona cu semper tabatin gran determinacion pa logra cualkier meta cu e pone su dilanti. El a dura 3 aña ta traha den dia y studiando anochi, te cu na final el a yega su trabao actual. El a cuminsa den muziek for di “mas o menos 3 pa 4 luna den bariga di mi mama,” el a comparti cu harimento. “Mi mama a conta’mi cu ora nan tabata toca na Iglesia, mi tabata dal su bariga asina duro cu e mester a sinta y esaki ta unicamente ora e cantica tabata zona. Despues ora cu mi a yega alrededor di 2 pa 3 aña, mi ta corda ainda cu mi tabata gara weya cu cuchara, pone un cassette den radio, y toca den cas.”

E pasion aki a crece cune y eventualmente el a uni un scol di musica unda el a siña drum pa 2 aña y eventualmente a sigui na siña piano y e ta conta cu “despues di mas o menos 1 aña, e meneer a forma un banda cu e studiantenan cu mas a resalta y tabata hiba nos toca na misanan y conciertonan pa nos siña mas di esey.” Asina el a dura 5 aña ta siña piano, despues 6 luna ta siña guitara y 2 luna ta siña bass, aunke na final piano a keda cu su curason.

For di chikito Richelina y Ruauny tabata gusta di musica. Richelina semper a gusta canta y a nace cu un gran talento cu su ruman semper a apoya y sostene, “semper e tabata forsa’mi,” Richelina a conta, Ruauny agregando cu e tabata bis’e “‘ban bo por, yega e nota’.” Mientras cu Richelina ta inspira cu su bos, Ruauny ta complementa esaki cu bunita melodianan riba piano, “ami tabata mas den piano, mi tabata canta tambe y sa di bos,” Ruauny a conta.

Eventualmente Rodrigo a conoce Richelina na misa, y ey nan a cuminsa toca hunto. Via di Richelina, el a conoce Ruauny tambe y asina ta con e 3 cara principal di Chosen Melody a yega na otro.

Chosen Melody ta un grupo di 14 musico y cantante Cristian na Aruba di 5 diferente iglesia cu a uni nan talento pa trece algo diferente na e pais. Via e grupo aki, nan ta crea nan propio musica, cu videonan musical cu ta trece un formato nobo na e isla y ta comparti mensahenan profundo cu mundo.

Richelina ta conta cu ora nan tabata buscando un nomber, algo importante tabata “e palabra cu nos tur ta scogi door di Dios. Y algo cu a bin den nos curason ta cu e prome cos ta e unidad di diferente iglesia. E nomber ta encera cu no tin di haber di cua iglesia bo ta, bo tambe ta scogi.” Y esaki ta algo cu nan kier comparti cu henter mundo, tanto esnan cu ta devoto y esnan cu talbes no. No ta importa di unda nos ta bin, semper nos ta e persona indica pa algo y esaki ta e mensahe cu nan kier trece via e melodianan cu nan ta crea hunto.

“Nada grandi ta facil,” nan a comparti. Aunke e tabata algo bunita y un soño cu finalmente nan por a cumpli, nada grandi ta bin sin su dificultadnan. Un di e dificultadnan mas grandi, y cu posiblemente ta resona den varios otro aspecto of sector, ta e limitacionnan cu ta enfrenta na Aruba. “Pa cualkier musico, e soño ta di biba di esey. Bo no kier ta trahando na un caminda siendo cu bo pasion bo tin cu hacie den bo tempo liber cu loke ta sobra di bo tempo. E reto mas grandi ta cu pa nos como musico, y na nivel nacional di Aruba, pa bo por biba di muziek ta algo casi imposibel.”

Den un di e ehempelnan cu a trece dilanti, a papia tocante servicio di Paypal. “Na Aruba bo por gasta so. Via paypal bo por gasta miles di dollar, pero bo no por haya ni un dollar via paypal. Mi ta sinti cu como pais, Aruba ta hopi limitante.” Aunke actualmente, nan no ta na e punto unda esaki ta un parti crucial, e ta algo cu eventualmente nan lo kier yega na dje y esaki ta un punto cu varios sector, manera influencer of demas emprendedor, por comparti cu otro.

E mensahe cu nan kier comparti tocante Chosen Melody, ta cu “e meta den nos curason ta” pa tur hende por conecta di un manera genuino, “unda cu Chosen Melody yega, tin e libertad di duna Dios espacio pa haci locual e kier,” Ruauny a comparti. Rodrigo a agrega cu semper el a sigura pa duna su talento y pasion mas prioridad cu placa, y awendia e ta wak su mes miho para, “ora bo pone tur locual bo tin den man di Dios, semper e lo respalda’bo.”

Richelina a clausura agregando cu “cada persona mester sa cu nan tin un talento den un cierto area, pero musicalmente, e prome cos ta cu abo ta esun cu of ta limita bo mes of bo ta pusha bo mes pa crece. Nos mester a traha duro pa nos soño bira un realidad y ainda nos tin cu sigui traha duro. Cada soño y cada meta, tin un sacrificio su tras pero e resultado ta algo bunita.”