(AP)—Democratanan riba e Comite di Inteligencia di Senado ta demandando contesta despues cu nan ta bisa cu presidente Donald Trump a duna biyonario Elon Musk y su personal acceso na data sensitivo y secretonan clasifica como parti di nan trabao pa reorganisa e gobierno federal.
E legisladornan a skirbi ayera na Susie Wiles, e hefe di personal di Trump, y a puntra ki precaucion di seguridad a ser tuma pa preveni leaknan di informacion no autorisa pa e personal na e Departamento di Eficiencia Gubernamental, conoci como DOGE. Trump a scoge Musk pa ta encarga di e agencia, cual rapidamente a cuminsa traha pa desmantela henter agencianan di e gobierno federal.
Como parti di e esfuerso ey, Musk y su personal a haya acceso na sistemanan di computer cu e senadornan ta bisa ta contene posiblemente informacion medico y financiero sensitivo di miyones di Mericano como tambe informacion di payroll federal, documentonan clasifica, informacion tocante partnernan di inteligencia den exterior y e identidadnan di agentenan encubierto y fuentenan di inteligencia.
Den e carta, e senadornan a adverti cu seguridad nacional y e privacidad personal di Mericanonan por ta den riesgo si e informacion no ser maneha cuidadosamente—intencionalmente of debi na negligencia. Nan ta puntrando si e equipo di Musk a reuni cu oficialnan di inteligencia Mericano pa discuti con pa reduci e probabilidad di e malmaneho di e data y ki stapnan por ser tuma pa proteha informacion clasifica, manera e identidadnan di informantenan di e CIA of e accionnan di operativonan di inteligencia den exterior.
Informacion asina lo ta hopi valioso pa agencianan di spionahe na Rusia, China, Iran y otro nacionnan, y su perdida lo pone bidanan den riesgo y mina esfuersonan pa preveni terorismo y otro menasa pa Merca, e senadornan a skirbi. “No a duna ningun informacion pa Congreso of e publico tocante ken a ser contrata formalmente bao DOGE, bao ki autoridad of regulacion DOGE ta operando, of con DOGE ta investigando y monitoreando su empleado- representantenan prome cu duna nan acceso na material clasifica y informacion personal di Mericanonan,” e senadornan a skirbi.
E carta a ser firma pa shete Democrata sirbiendo riba e Comite di Inteligencia como tambe senador independiente Angus King di Maine. Esaki a ser publica riba mesun dia cu e CIA a anuncia cu el a ofrece pa cumpra un cantidad di empelado.
Representante Jim Himes di Connecticut, un Democrata riba e Comite di Inteligencia di e House, a expresa su mesun preocupacion cu e evaluacion di e administracion di Trump di empleadonan di CIA por revela detayenan cu ta perhudica seguridad nacional y agentenan den operacion.
“E detayenan ey ta secreto pa un motibo—pasobra pa proteha e identidadnan di empleadonan di CIA ta importante pa nan seguridad y mision, un mision cu ta yuda mantene Mericanonan safe tur dia,” Himes a bisa. E Cas Blanco no a responde inmediatamente na e preguntanan di e senadornan. Musk a rechasa e critica di su envolvimento den gobierno, bisando cu esaki ta demostra cu su esfuersonan ta necesario.
