Despues di hopi curiosidad den comunidad, DOW ta anuncia Micro Paving riba Green Corridor

Recientemente, redaccion di Bon Dia Aruba a tuma nota di desaroyonan cerca di Drive In, unda por a nota cantidadnan grandi di saco cerca di e brug. Igualmente, varios lector a acerca Bon Dia Aruba pa puntra kico precies tabata sucediendo.

Den nos tarea pa informa comunidad, siman aki Bon Dia Aruba a tuma contacto cu Departamento di Obra Publico, DOW pa haci pregunta riba e trabaonan den e area.

Como contesta, e departamento a publica riba su pagina di Facebook un comunicado cu a comparti ayera cu nos corant.

“Departamento di Obra Publico ta desea di informa comunidad di Aruba ariba un punto cu nos ta hayando basta pregunta. Cuminsando for di weekend cu a pasa, por a tuma nota cu tin bultonan (saco blanco) cerca di e brug di Green Corridor. Esakinan ta e materialnan pa traha e Micro Paving,” e comunicado ta bisa.

“Micro Pavement ta un mescla di polymer modifica, cu ta wordo aplica friu usando ekiponan specialisa riba e caminda di asfalt pa alarga e bida di e capa di asfalt. E ta un sistema conoci mundialmente cu lo bay wordo aplica riba e camindanan cu ta cay bou di e proyecto di Green Corridor,” DOW ta informa.

Segun e comunicado, ta usa e Micro Pavement na pidanan di e caminda cu “a cuminsa perde grip of tin scheurnan fini.” A indica cu ta bay implementa e sistema aki riba Green Corridor “como prevencion pa asina percura pa e camindanan di Green Corridor keda cu e grip necesario y cera e scheurnan fini cu ta normal despues cu e caminda tin algun aña caba.”

Tambe a menciona cu na momento di aplica e Micro Pavement, esaki tin un color bruin, pero despues di seca despues di algun ora, e ta bira preto.

“E aña aki, Green Corridor lo cuminsa cu e prome camindanan pa aplica e Micro Paving. Nan lo cuminsa for di Yara bay pa Weg Fontein. Manera nos tin e fecha cu lo bay cuminsa cu e micro paving lo informa na unda trabounan ta bay tuma lugar,” e comunicado a conclui.

Mantencion di caminda

Mientras tanto, hopi caminda na Aruba ta den condicion deplorable. Recientemente, e anuncio di DOW cu lo drecha caminda cu ta cay den e ruta di paradanan di Carnaval a hala hopi atencion. Mientras ta compronde e necesidad pa e camindanan den ruta di parada di Carnaval ta optimo pa un evento cu ta atrae local y turista den cantidadnan grandi, ta cuestiona e manera di organisa ki caminda ta drecha na ki momento. Esaki pasobra keto bay tin cantidad di caya cu ta hasta forma peliger pa e autonan cu mester core riba nan.

Ciudadanonan cu a acerca mesa di redaccion di Bon Dia Aruba a cuestiona pakico ta duna prioridad na Carnaval, en bes di e pagadonan di belasting cu ta paga pa haci uso di caminda, y toch mester core riba camindanan cu no ta apto y cu por hasta causa daño na auto.