Dia 22 di januari ultimo Corte di Prome Instancia di Aruba a dicta sentencia den caso Flamingo y a declara actual parlamentario, lider di fraccion PPA Otmar Oduber culpabel di fraude, intento di fraude y abuso di su funcion. Ministerio Publico (OM) a anuncia cu nan a apela e sentencia aki.

Segun e noticiero local Noticia Cla, OM a anuncia cu a apela e sentencia contra Oduber den caso Flamingo y a apela e sentencia di E. Esser, ken a ser declara liber di e cargonan den su contra.

Ministerio Publico a indica cu no ta di acuerdo cu e parti di vrijspraak cu e hues a dicta ni tampoco cu e sentencianan cu Oduber a haya.

Tabatin un total di cinco acusacion, cu tabata trata diferente caso, entre otro fraude, estafa y tambe maluso di su poder como minister e tempo ey. Hues a indica cu e ta haya cu a ser legalmente y convincentemente proba cu Oduber a haci su mes culpabel di estafa. Hues a indica tambe cu e ta haya cu por declara prueba e parti di fraude den caso di entrega di tereno Malmok y e caso di spookambtenaarnan.

Hues a duna Oduber un castigo di 65 dia di prizon di cual 319 dia ta condicional, y un tempo di prueba di tres aña. Esey kiermen cu 46 dia, cual el a sinta caba, esey e ta hay’e como castigo incondicional di prizon. Esey ta nifica cu Oduber no mester bay prison.

Ademas di e castigo di prizon hues a dicta cu Oduber ta haya castigo di trabou comunitario di 240 ora y si e no cumpli cu esaki e ta haya 120 dia cera.

Inicialmente hues a duna Oduber tambe un castigo adicional cu OM a pidi cu ta kita e derecho pa por traha den un funciona publico, como ambtenaar y tambe ta kita e derecho cu comunidad di Aruba por vota p’e den un cualkier eleccion pa un periodo di tres aña.

Despues di algun dia, hues a saca un notificacion di rectificacion den e sentencia di Oduber pa motibo di “un eror obvio.”

Den e documento di e coreccion di sentencia hues ta indica cu a bira bisto cu a comete un eror obvio den e sentencia y den e basenan pa e sentencia cu ta presta su mes pa coreccion pa medio di un sentencia corectivo.

E documento ta splica cu e sentencia ta mustra claramente cu e persona condena a keda absolvi di e cargo di soborno pasivo manera cu tabata inicialmente acusa y cu e intento di fraude, fraude y abuso di funcion si a keda prueba.

Den e documento ta splica cu corte ta determina cu riba pagina 50 di e sentencia dicta, e texto referi na dje den e basenan di e sentencia, “y di e derecho pasivo di voto”, mester ser elimina.

Ademas corte ta determina cu riba pagina 52 di e sentencia dicta, e castigo adicional menciona den e parti operativo: “ta priva e sospechoso di e derecho di wordo eligi como miembro di organonan general representativo pa un periodo di 3 (tres) aña” ta caduca.

Esaki ta nifica cu Oduber por keda den parlamento como lider di fraccion y por postula su mes durante eleccion.