Recientemente, mediante un comunicado di prensa, a bira conoci cu Conseho di Minister di Hulanda a aproba e nombracion di Sr. Gerbert Kunst como e Representante nobo di Hulanda na Aruba, Corsou y Sint Maarten.

Segun informacion, e nombramento di Sr. Kunst a tuma luga riba recomendacion di Secretario di Estado pa Digitalisacion y Relacionnan den Reino, Zsolt Szabó. E nombramento aki lo drenta na vigor dia 15 di mei 2025.

Pa loke ta trayectoria di Sr. Kunst, actualmente e ta fungi como Director di Politica Internacional na e ministerio di Enseñansa, Cultura y Ciencia (OCW). Anteriormente e tabata Consul General di Reino Hulandes na San Francisco y Director di Asuntonan Europeo y Internacional na ministerio di Asuntonan Economico. Sr. Kunst a studia ley na Leiden y tambe tin un Master of Business Administration (MBA) y un Master of Public Administration (MPA).

Represantacion di Hulanda na Aruba, Corsou y Sint Maarten (VNACS) tin oficina na Willemstad, Oranjestad y Philipsburg y ta representa Hulanda den e tres paisnan. E Representante ta encabesa esaki y ta hunga un rol crucial den mantencion di bon relacion cu e tres paisnan autonomo. VNACS ta contribui na desaroyo di politica Hulandes pa e paisnan y na su implementacion.

Ademas VNACS ta brinda guia y ayudo na Hulandesnan den necesidad y ta coordina e maneho di ayudo di Hulanda den crisisnan grandi. E representacion ta ehecuta su tareanan den bon cooperacion cu tur cuater pais den Reino.

Te ora cu e representante nobo sinta, Sr. drs Saskia de Reuver, den su funcion como Director di Relacionnan den Reino/Paisnan na ministerio di Interior y Relacionnan den Reino, lo asumi e funcion di Representante na Aruba, Corsou y Sint Maarten.

Secretario di Estado Szabó a indica cu e ta contento cu e nombramento di Sr. Kunst. “Gerbert Kunst ta trece un rikesa na experiencia internacional y for di Den Haag cune. E ta un profesional motiva y mi ta spera cu hunto cu su coleganan e lo bira e intermediario importante cu por duna un contribucion riba tanto tereno economico-financiero, como e tereno di mantencion di ley, pa amplia y profundisa e relacion. Mi ta contento cu nos a haya un candidato pa e puesto aki, cu en bista di su conocemento y experiencia cu e partinan Caribense di Reino, tin bista pa loke tin mester pa un bon cooperacion entre Hulanda y Corsou, Aruba y Sint Maarten,” el a bisa.