(AP)—Despues di tres aña purbando di preveni Rusia di destrui Ucrania, lidernan den Union Europeo a lucha ayera con pa responde na un aliado importante cu ta parce determina pa cuminsa un guera di tarifa of hasta tuma un parti di nan teritorio.
E lo ta “un paradox cruel si, durante e tempo di e menasa directo for di Rusia y expansion Chines,” UE y Merca haya nan mes den un “conflicto entre aliadonan,” segun prome minister Polaco Donald Tusk, di ken su pais actualmente ta tene e presidente rotario di e organismo.
Desde cu el a tuma oficina luna pasa, presidente Mericano Donald Trump a menasa pa impone tarifa riba importacion for di UE y a nenga pa descarta uso di forsa militar pa tuma control di Groenlandia, un teritorio autonomo di aliado di NATO, Dinamarca.
Trump tambe confundi Europeonan por medio di mustra tiki señal di con e lo stop e guera na Ucrania dentro di seis luna manera el a priminti. “Nos mester haci tur cos posible pa preveni e guera di tarifa estupido y innecesario aki,” segun e prome minister Polaco a conta reporteronan na Bruselas, unda lidernan di UE a reuni pa discusionnan riba fortalecemento y mehoracion di gasto militar y engrandeciendo e industria di defensa di Europa.
Tusk a bisa cu e masanan di Trump ta “un test serio” di Europa su unidad, y “den un contexto hopi straño, pasobra ta prome biaha unda nos tin un problema asina entre aliadonan.” Presidente Frances Emmanuel Macron a bisa cu UE ta “un poder cu ta para firmemente” y cu si e haya tarifa, e bloc di 27 nacion “lo mester exigi respet.” El a bisa cu e menasanan di Trump ta “pushando Europeonan pa ta mas uni, mas activo den atende nan retonan colectivo riba seguridad.”
Trump a impone tarifa riba hero y aluminium Europeo durante su prome termino, y lidernan di UE ya a tuma contacto cu prome minister Canades, Justin Trudeau, desde cu Canada a impone tarifanan di represalia riba productonan Mericano como respuesta na e tarifa di 25% imponi pa Trump. E presidente Mericano a acorda dialuna riba un pausa di 30 dia riba su menasa di tarifa mientras e dos partner comercial mas grandi Merca ta tuma stapnan pa calma su preocupacion tocante seguridad riba frontera y narcotrafico.
