(AP) — Seis Mericano cu a ser deteni na Venezuela e ultimo lunanan cu a pasa a ser libera pa e gobierno di Presidente Nicolás Maduro despues di un reunion cu un oficial di e administracion di Trump cu e tarea di insisti pa e presidente Venezolano acepta deportacion di esnan cu a comete crimen na Merca.
Presidente Donald Trump y su envio pa mision special, Richard Grenell, a anuncia e liberacion di e seis homber ariba red social. E bishita di Grenell tabata un shock pa hopi Venezolano cu a spera cu Trump lo sigui su campaña di “presion maximo” cu el a usa contra Maduro durante su prome periodo.
Biahe cu enfoke ariba deportacion di Venezolanonan y liberacion di Mericanonan
E biahe di Grenell pa Venezuela, segun e Cas Blanco, tabata enfoca ariba e esfuerso di Trump pa deporta Venezolanonan pa nan su pais, cu actualmente no ta aceptando nan, y ariba e liberacion di Mericanonan cu a ser deteni.
“Nos ta sali for di aki y bin back cu 6 ciudadano Mericano” Grenell a post ariba X (Twitter) cu un potret di dje cu e 6 Mericanonan ariba un avion. “Nan a caba di papia cu @realDonaldTrump y ta hopi agradecido”.
Diasabra, Trump a skirbi ariba su website di red social Truth Social cu e ta contento pa tin e Mericanonan back na cas.
