Ayera muchanan a jump, baila y gosa durante Parada di Fantasia na San Nicolas. Un total di siete grupo a participa den e parada y a pesar di e cantidad chikito di participante, e muchanan a disfruta di e prome parada di carnaval pa mucha di Carnaval 71.
Parada di Fantasia, anteriormente conoci como Parada di Blaas, a tuma luga ayera den cayanan di San Nicolas y a conta cu un total di siete grupo. Segun schedule parada tabata poni pa sali 2or di atardi, pero a sali pa 2:09, un poco laat, pero no ta un gran diferencia y no tabata motibo pa rush e muchanan pa yega final, cu segun programa e cabes di e parada mester a yega pa 5:15 di atardi back na Joe Laveist Sportpark. Un aspecto cu a resalta e aña aki ta cu parada a habri sin brassband, algo cu normalmente ta e tradicion. E aña aki no tabatin brassband y esaki sigur a haci falta.
Centro di Bario Noord tabata e prome grupo, aunke no a conta cu ningun participante, Reina Infantil di Aruba su Carnaval, Camila-Victoria Feliciana, compaña pa Reina Infantil di Noord 2025 Amelie Koolman y Reina Infantil di Carnaval 70, Xeena Dijkhoff.
TOB Kids Carnival Group tabata grupo number; Empire Kids Carnival Group
tabata grupo number tres; Unity Carnival Group tabata grupo number cuater; Little Groovers Carnival Group tabata grupo number cinco; Don Flip Carnival Group tabata number seis; y Champagne Kids Carnival Group tabata ultimo grupo.
