Januari a cera cu mas placa den cartera pa un grupo di ciudadano; Gobierno awor tin menos placa pa yuda esnan vulnerable cu no ta probecha di reduccion loonbelasting

E reduccion di belasting riba salario, loonbelasting, a drenta na vigor e luna aki y pa esnan cu ta traha payroll pa companianan, e ta ilustra cu toch tin hende ta bay mira cu ta keda mas placa den nan cartera.

Manera ta conoci, Gobierno hunto cu Departamento di Impuesto a anuncia cu ta elimina loonbelasting riba entradanan bou 64.930 florin pa aña. Te cu 2024, e cobranza di loonbelasting, cu ta un adelanto di e impuesto riba entrada (inkomstenbelasting) tabata cuminza na un salario di 30.000 (30 mil) florin. E porcentahe tabata 10 porciento pa e salario anual aki te cu e suma di 64.930. E cambio awor ta nifica cu esnan cu ta gana te cu 64.930 florin a base anual, ta paga cero (0) porciento na loonbelasting y consecuentemente, si no tin mas entrada, no mester paga mas na impuesto riba entrada.

Segun Cesar Angela, kende despues di su trabou como Ontvanger di Aruba ta den sector priva pa conseha y guia riba tema di belasting, e decision pa cambia e “‘schijf’ di pago di loonbelasting ta resultado di e cambio di pago di belasting directo pa uno indirecto,” Angela a aplica. “For di momento cu a introduci BBO tabata e intencion pa kita di belasting directo pa uno indirecto. Realmente, a tarda cu e paso aki.”

Pa prome salario di 2025, dependiente di e nivel di salario, e ta nifica cu algun hende por mira te 291 florin mas riba nan entrada. “Logico, e pago di primanan pa AZV, AOV y AWW ta keda mesun cos y ta un porcentahe di e salario, te cu un maximo di 85 mil florin pa aña,” Angela a splica.

Anthony Croes di Plus Accounting ta mira e cambio den e nivel di salario pa paga loonbelasting como algo positivo. “E cambio di e limite’ ta hopi bon,” Croes, un Register Accountant a comenta.

50 miyon menos

Fiscalista mr. Robert Tromp, sinembargo ta mira e cambio como un reto pa e siguiente Gobierno. Pasobra apesar cu a haya mas entrada cu BBO, e paso ta nifica cu Gobierno lo haya 50 miyon florin menos den caha. “Nunca mi a experiencia un aumento asina grandi di e limite. Semper tabata cambia e prome ‘schijf’, pero cu pasonan chikito. Esaki tabata un stap masha grandi mes. Pasobra awor no ta cobra belasting mes. E no ta usual.”

Locual Tromp ta mira diferente cu otronan ta cu di un banda a presenta e decision como un acercamento na esnan mas vulnerable den comunidad, mientras cu e realidad ta otro. Pasobra esnan cu tabata gana un salario igual of menos cu e asina yama ‘bestaansminimum,’ no tabata paga belasting. Esnan cu entrada mas abou no ta mira ningun beneficio. Ta unicamente personanan cu salario mas halto, for di 34 mil florin te 70 mil, cu ta bay mira reduccion den belasting. “E ta un medida pa yuda clase media, y no pa esnan marginal.” E caida di 50 miyon florin di entrada lo dificulta e siguiente Gobierno pa realmente yuda esnan cu menos entrada, por ehempel cu aumento di e ‘reparatietoeslag.’ “No ta duna Gobierno e espacio pa hisa e sosten na esnan cu sueldo minimo, ni pensionadonan cu ta depende solamente riba e pensioen di SVB.”

Dos trabou

Pa esnan cu ta traha dos trabou, cu ta un grupo relativamente grandi na Aruba, nan entrada combina, basta cu e no yega e suma di 64.930 florin, tampoco lo paga loonbelasting. “Si hunto ta yega 41 mil florin bo no ta paga belasting via ningun dunado di trabou, y si yena bo formulario di inkomstenbelasting, tampoco ta bay paga, si ta keda bou 70 mil. Pero esnan cu tin dos trabou, y si ta gana mas di 70 mil, tampoco lo paga loonbelasting. E diferencia ta cu na momento cu e suma acumula ta mas cu 70 mil, e ora si lo mester paga inkomstenbelasting.”

Segun mr. Tromp, den e sentido aki, e cambio den nivel di pago di loonbelasting ta cumbini personanan cu ta traha dos trabou, esta cu nan lo keda cu mas placa den man na fin di luna. “Pero atrobe, a base di locual a splica, esaki no tabata e argumento di e cambio den e limite di pago di belasting. A present’e como un acercamento pa esnan cu menos recurso y esey no ta e caso.”

Economia

Mas placa den man di ciudadano por tin un efecto positivo pa economia, e fiscalista a sigui bisa. “Sinembargo esnan cu mas entrada, no semper lo hinca e cen adicional den economia. Contrario na e caso di esnan cu ta gana sueldo minimo. Nan ta biba mas preta y lo si lo gasta placa. “Aunke cu den e grupo aki tin hopi hende cu ta manda placa, remesas, afo. Pues si hisa e entrada di e grupo aki sin mas, no tur e placa lo keda den economia.” Tempo lo mustra kico e efecto lo bay ta, e fiscalista a splica.

No mas restitucion

Un efecto di e cambio di limite pa loonbelasting tin efecto pa e inkomstenbelasting den sentido cu e ta keda un obligacion pa entrega esaki anualmente. Mirando cu loonbelasting ta un adelanto di inkomstenbelasting, si no mester di paga mas, e suma cu tin cu yena di obligacion di pago ta cero (0). Pero alabes esey ta nifica cu entrante 2025, pa esnan cu ta gana bou 70 mil florin pa aña, ya lo no tin restitucion for di Departamento di Impuesto. “No lo tin nada pa ricibi bek,” Cesar Angela a mustra.