(Entertainment Weekly) – Selena Gomez ta bou di atake di administracion di Trump. Un video controversial a ser publica ariba e cuenta oficial di red social di Cas Blanco diabierna. E video ta presenta tres muher — Tammy Nobles, Alexis Nungaray, y Patty Morin — di ken nan yiunan a ser mata pa un inmigrante ilegal. Den e video, nan ta reacciona na e post di Selena Gomez ariba Instagram, unda el a yora pa e tratamento di Mexico-Mericano y otro inmigrante bou di e administracion nobo.
E muhernan den e video ta duda e sinceridad y intencion di Gomez. “Mirando e video, ta dificil pa kere cu su reaccion ta realmente real, pasobra e ta un actriz,” Nungaray ta bisa.
E video despues ta move pa mustra tur tres muher expresando nan apoyo pa presidente Donald Trump y su politica di anti-inmigracion.
E titulo di e post di e Cas Blanco ta tag e cuenta di Gomez riba Instagram bisando: “[E] mamanan balente tin algo di bisa @SelenaGomez y esnan cu no ta apoya e siguridad di nos frontera”.
E post — cual ta un poco straño, pasobra e cuenta oficial di Cas Blanco no sa dirigi respuesta riba individuo specifico — a trece critica grandi. “Kico ta pasando? Con bin cu e cuenta oficial di e Cas Blanco ta post esaki? Bo ta serio?” un persona a comenta.
