Ayera den oranan di mainta Cuerpo Policial Aruba a haya e tristo noticia cu ex altocomisario di Polis Sr. Rolando Facundo Bernadina a bay sosega. Sr. Bernadina tabata e di cuater altocomisario di Cuerpo Policial Aruba y tabata tin funcion desde aña 2003 pa 2006.
Sr. Bernadina tabata tin un carera excepcional den Cuerpo Policial Aruba. El a drenta servicio ariba 1 januari 1979 e tempo ey bou di Cuerpo Policial Antiyas Hulandes na Aruba. El a cuminsa cu su carera policial como un aspirant, ela sigui su carera policial, traha na diferente departamento, sigui studia na Hulanda bin bek Aruba sigui studia t’e cu e la bira altocomisario di Polis na aña 2003.
Tabata un gran honor p’e pa por dirigi un Cuerpo Policial e tempo ey. Sigur no a bay asina facil pero a haye cu reto pero a sa di surpasa esaki. Cu amplio experiencia den Husticia y Seguridad sr. Bernadina tabata hunga un rol importante pa pais Aruba.
Sin mas un ex altocomisario cu pasion, dedicacion pero cu hopi respet a sa di mantene e organisacion riba pia. Cu su famia fuerte cu a para su tras cu tambe tabata su motor y guia.
Sr. Bernadina despues di hopi tempo a haya confrontacion cu sa salud pero asina mes tabata tin e gana di sigui lucha y bai dilanti. Nos a perde un cabayero, un meneer un amigo pero un altocomisario di Polis cu a traha pa hiba KPA na e siguiente generacion. Un persona cu carga un organisacion cu awe danki na dje cu a forma parti di dje nos por ta orguyoso.
Di parti famia blauw di Cuerpo Policial Aruba, nos ta desea su casa, famia y yiunan hopi forsa cu e perdida di un gran buluarte pa nos organisacion policial. Cu Sr. Bernadina sosega na paz den e nubianan blauw, pa semper un amigo den blauw. Bon Dia Aruba ta manda palabra di condolencia na famia y sernan keri di Sr. Bernadina.
