(AP) – Un ex hefe di bombero di New York City a declara su mes culpabel diaranson na cargo di conspiracion, admitiendo cu su persona y otronan a keda di acuerdo pa acepta 190,000 dollar den soborno pa apresura inspeccion di seguridad pa clientenan di ex bombero di e ciudad.
Anthony Saccavino, ken na momento cu e crimennan a keda cometi tabata hefe di e departamento su Bureau of Fire Prevention, a haci e declaracion den corte federal di Manhattan, unda a stipula cu lo dicta sentencia dia 14 di mei.
Ora cu a acusa Saccavino den september, el a keda deteni conhuntamente cu Brian Codasco, otro ex hefe di bombero cu a declara su mes culpabel den october na cargo di conspiracion. Cordasco lo ricibi su sentencia den maart.
E detencionnan aki a bini den medio di investigacionnan di corupcion federal di miembronan di e administracion di alcalde Eric Adams, aunke e proceso di Cordasco no tabata relaciona ni conecta na e investigacionnan aki.
Adams, un democrata, a declara su mes inocente na cargonan acusando cu el a acepta alrededor di 100,000 dollar pa vuelonan gratis of cu descuento grandi, estadia na hotel, cuminda y entretenimento pa contribucionnan di campaña ilegal for di un oficial Turco y miembronan di e comunidad di negoshi Turco.
Bureau of Fire Prevention ta responsabel pa regula e instalacion di sistemaman di seguridad pa candela na New York City y garantisa cu regulacionnan di seguridad di candela ta cumpli.
Un acuerdo firma cu gobierno a recomenda pa Saccavino ricibi un sentencia di 5 aña den prizon. Tambe e acuerdo a pidi pa Saccavino regresa 57,000 dollar den soborno cu el a ricibi prome cu e plan a keda descubri. Autoridadnan a bisa cu Saccvino a ehecuta e plan for di 2021 te cu 2023.
