Durante un bishita di trabou e fondo lo combersa cu periodista- y creadonan periodistico, pa siña di periodismo local y duna informacion tocante areglo di subsidio existente di e fondo.
For di 30 di januari te cu 16 di februari 2025 Fondo pa Proyecto Periodistico Special (Fonds Bijzondere Journalistieke Projecten – Fonds BJP) ta haci un bishita di trabou na Corsou, Aruba, Boneiro, Sint Maarten y Saba, cu e meta pa cera conoci cu periodista- y creadonan periodistico di e parti Caribense di Reino. Durante e biahe di trabou aki, Joëlle Terburg, director di e fondo special aki, y Wensley Francisco, creado di programa y documental, ta spera di siña mas tocante e necesidadnan specifico di periodismo local, y pa trece e posibilidadnan cu e Fondo ta ofrece na atencion di periodista- y profesionalnan di medionan di comunicacion local.
Fondo pa Proyecto Periodistico Special ta un fondo di subsidio cu ta sostene periodista- y creadonan periodistico cu subsidio pa proyecto pa produccionnan periodistico mas grandi, manera documental, reportahe (web), podcast y obra skirbi. Banda di esaki e fondo ta forma parti importante den desaroyo di talento di e periodista, pa gana experiencia periodistico pa medio di pasantia,y beca pa curso y capacitacion. Te cu awo e actividadnan di e fondo tabata enfoca principalmente riba Hulanda Europeo, pero e cantidad di peticion for di e area Caribense cu ta keda atras y e deseo pa sincronisa e areglo mas miho cu e necesidadnan di e periodistanan for di e area ey, a conduci na e plannan pa e biahe di trabou aki.
Joëlle Terburg ta duna splicacion tocante e biahe: ‘Nos ta mira cu tin hopi calidad y talento riba e islanan aki, pero nos ta mira tambe cu tin desafio specifico cu kisas nos por sostene mas miho cu nos fondo. A bira tempo pa nos hala mas cerca y drenta den combersacion cu e periodistanan y creadonan periodistico pa tende kico realmente ta nan necesidad.’ E fondo aki ta brinda diferente forma di sosten, for di subsidio pa proyecto te beca pa desaroyo periodistico. Banda di e formanan di sosten aki tin tambe e Programa di Formacion y Trabou (traineeship) pa Periodismo di Investigacion y e Beca pa Desaroyo Periodistico pa periodistanan (freelance) cu kier sigui desaroya nan mes mas leu. Tambe e fondo ta organisa encuentronan pa promove intercambio y colaboracion entre periodista y e ta brinda oportunidad pa experimenta cu formanan nobo di narativo y di publicacion.
Tocante e Fondo pa Proyecto Periodistico Special
E Fondo pa Proyekto Periodistico Special a ser lanta na aña 1990 y ta duna sosten na periodistanan. E financiamento ta bin for di e Presupuesto di Cultura y Medionan di Comunicacion di Ministerio di Enseñansa, Cultura y Ciencia y tin como meta sosten e produccion di proyectonan periodistico independiente y pa stimula desaroyo di periodistanan. Durante e biahe di trabou no ta presenta e fondo solamente como fuente di financiamento, pero ta spera cu e por contribui tambe na periodismo local. Pa mas informacion y e areglonan disponibel, por bishita www.fondsbjp.nl. Actualmente e website ta disponibel solamente na Hulandes. Pa mas informacion tocante e bishita di trabou na e islanan, pa traha un cita personal of pa participa na e encuentronan/tayernan informativo, tuma contacto cu e coordinadonan di e bishita di trabou.
