Diaranson mainta, señor Jonathan Upegui di Directie Economische Zaken, Handel en Industrie (DEZHI) a duna un presentacion na Prome Minister Evelyn Wever-Croes tocante e Economic Outlook 2024-2024.

Crecemento economico substancial

Recientemente, Departamento di Asuntonan Economico a recalibra e cifranan di crecemento economico premirando un crecemento di nos GDP aun mas grandi di loke cu a spera. Pa 2025 e crecemento economico lo ta 3.9 %, cu ta un suma substancial di 2.6 % mas halto di loke a tene cuenta cune inicialmente. Prome Minister a remarca cu esaki ta nifica cu pa e aña aki ta spera mas entrada cu a premira den prome instante. Esaki ta trece cu ne tambe mas espacio financiero pa por haci inversionnan y of otro tipo di decisionnan cu por wordo haci e aña aki.

Den e presentacion hopi impresionante di DEZHI, señor Upegui a elabora riba e crecemento aki ampliamente. Esaki, Prome Minister a remarca, ta un bon noticia pa nos pais y algo sigur pa comparti.

Crecemento economico ta induci pa e crecemento di nos turismo

Un otro punto cu a bin na remarca ta cu e crecemento economico ta induci pa e crecemento di nos turismo cu ta bayendo hopi bon na Aruba. Exito di turismo ta danki na tur esnan cu ta laborando den e sector aki. E resultado di un vision ambicioso y responsabel como tambe un resultado di e trabou duro di Aruba cu e aña aki, un biaha mas ta yuda trece espacio financiero y mas desaroyo economico pa asina por duna bek na nos comunidad.

Inflacion

E tema di inflacion tambe tawata un punto den e presentacion. Inflacion ta premira di ta keda na 1.7%. Inflacion ta un problema mundial y na Aruba esaki no ta un excepcion. Sinembargo, nos inflacion keto bay ta esun mas abou cu region, cu Hulanda y Merca. E bon noticia ta cu inflacion lo no sigui crece. A tene cuenta cu cierto factornan cu ta hisa inflacion y cu esunnan cu ta baha inflacion y e departamento ta premira cu inflacion lo keda mantene riba e nivel aki.

Surplus

Refiriendo na e cifranan di surplus, Prome Minister a indica cu Aruba tawata tin un surplus di 1.8% pa e aña aki. E norma tawata 1% y esaki a crea suficiente espacio pa baha tarifanan di inkomstenbelasting y loonbelasting. Cu e rebahonan aki, surplus awo ta na 1.5%, ainda e ta 0.5 % mas halto di loke ley ta prescribi.

“Esakinan ta noticianan bon pa Aruba cu ta mustra cu 2025 ta bay ta un bon aña un biaha mas. Turismo lo ta e driver di nos economia. Nos economia ta sigui crece y e crecemento aki ta uno substancial”, Prome Minister a expresa.