Fundacion Motor Unit Aruba (VMUA) ta un fundacion cu ta consisti di bikers di diferente Club di Motorcycle. Y conoci pa duna asistencia na organisacion nan durante caredanan y caminata, competencia di ciclismo y entiero nan.
Den 11 aña di existencia Fundacion Motor Unit Aruba ta traha hunto cu polis pa cu e seguridad di e participantenan ariba caminda. Diasabra 1 di februari pa 5’or di atardi VMUA hunto cu J P Visser Orthopedic Technical Center ta organisa un evento specialmente pa mucha, hoben y adulto (mayor)) cu un limitacion fisico. E distancia ta 600 meter. Y por bay e ruta maximo 2x cual e ora lo ta maximo 1200 meter.
E evento ta cuminsa na Paradera, patras di e santana, na altura di e oficina di JP Visser Orthopedic Technical Center. Lo tin na cada skina di e ruta un team di apoyo pa “Cheer” y “Support” tur e participantenan. Lo NO tin timing system. Solamente un Bibnr. Lo concentra mas ariba seguridad di tur participante. E ta prome biaha y e meta ta pa promove participacion, inclusion, conscientisacion y have fun. Por registra via J P Visser Orthopedic Technical Center, yamando telefon: 582-2929.
E siguiente dia, diadomingo 2 di februari, Lo tin categoria pa mucha desde 4 te cu 13 aña, hoben for di 14 te cu 16 aña y adulto for di 17 aña PLUS. Kiermen no tin excuus pa no participa. E evento ta cuminsa 6 AM en punto pa e adultonan y 7 AM pa mucha- y hoben nan. Distancia lo ta 6KM pa adulto y pa e muchanan e distancia ta varia depende di nan edad. E START ta patras di e Santana na Paradera na altura di JP Visser Orthopedic Technical Center Tin luga pa solamente 650 participante, cu ta inclui mucha, hoben y adulto. Por registra mas lihe posibel via WWW.VMURUN.COM of via e link: https://patrishisports.com/events/2nd-VMU-Run-&-Walk-2025.
Despues cu bo a registra online por paga personalmente na 1 di e 3 tiendanan di NATURE’S DISCOUNT sea na PALM BEACH, SEROE BLANCO of SAVANETA. Por haci pago solamente na Nature’s Discount. Corda registra online prome cu tur cos. No warda te ultimo momento. Lo tin premiacion overall den tur categoria di edad pa adulto, mucha y hoben. Na final lo tin fruta y bebida pa refresca.
Fundacion Volunteer Motor Unit Aruba ta pidi tur participante pa bisti un T-shirt di cualkier careda cu nan a supervisa ariba e rutanan rond di Aruba den e ultimo 11 añanan. Tene cuenta cu tin bon espacio pa parkeer na Club Caiquetio y vecindario. Fundacion Motor Unit Aruba ta conta cu un maximo participacion. Registra mas lihe posibel pasobra cupo ta limita.
