Pa motibo di “un eror obvio” Corte ta coregi sentencia dicta den caso Flamingo

Dia 22 di januari ultimo Corte di Prome Instancia di Aruba a dicta sentencia den e caso Flamingo, den cual a condena actual parlamentario y lider di fraccion PPA den parlamento, Otmar Oduber. Su sentencia tabata inclui un prohibicion di sirbi pais Aruba como ambtenaar y pa ser eligi den un cargo publico pa un periodo di tres aña. Dialuna Oduber y su abogado a ricibi e noticia cu tin un cambio den su sentencia.

E sentencia di rectificacion aki, cu ta sigui e sentencia di dia 22 di januari 2025 den e caso penal Flamingo ta identifica un eror den e sentencia cu mester ser corigi.

E noticia aki a causa confusion den comunidad y hopi ta cuestiona si esaki ta algo legal of no. Un sentencia di corte semper tin periodo prome cu e bira irevocabel, esaki ta mas tanto debi na e posibilidad cu e partidonan por apela, den e caso aki tanto OM como Oduber por apela.

Den e caso aki e coreccion ta corecto y legal pasobra e ta na fabor di e persona.

Den e caso aki tabatin cinco acusacion y esunnan cu hues a declara prueba no ta encera e posibilidad pa kita su derecho di representacion como parlamentario, pues pa e motibo ey corte a corigi e sentencia y a elimina e prohibicion pa Oduber representa pueblo y su derecho pasivo di voto. Den caso cu ningun partido apela, despues di algun tempo e sentencia por bira irevocabel.

Den e documento di e coreccion di sentencia hues ta indica cu a bira bisto cu a comete un eror obvio den e sentencia y den e basenan pa e sentencia cu ta presta su mes pa coreccion pa medio di un sentencia corectivo.

E documento ta splica cu e sentencia ta mustra claramente cu e persona condena a keda absolvi di e cargo di soborno pasivo manera cu tabata inicialmente acusa y cu e intento di fraude, fraude y abuso di funcion si a keda prueba.

Corte a considera eroneamente e castigo adicional di prohibicion di e derecho pasivo di voto y seguidamente a impone e castigo adicional aki den e parti operativo di e siguiente manera: “ta priva e sospechoso di e derecho di wordo eligi como miembro di organonan representativo general pa un periodo di 3 (tres) aña,” ya cu no tin base legal pa esaki.

Corte ta di opinion cu ni e persona condena ni Ministerio Publico lo keda perhudica den ningun interes legalmente respetabel door di drecha e eror aki.

Den e documento ta splica cu corte ta determina cu riba pagina 50 di e sentencia dicta, e texto referi na dje den e basenan di e sentencia, “y di e derecho pasivo di voto”, mester ser elimina.

Ademas corte ta determina cu riba pagina 52 di e sentencia dicta, e castigo adicional menciona den e parti operativo: “ta priva e sospechoso di e derecho di wordo eligi como miembro di organonan general representativo pa un periodo di 3 (tres) aña” ta caduca.

Corte ta remarca cu e sentencia di rectificacion aki ta laga e sentencia original, encuanto cu e no a ser amienda, completamente intacto y ta forma un totalidad inseparabel cu e sentencia original y no ta nifica tampoco cu lo tin un periodo nobo pa apelacion.

E sentencia di rectificacion aki a ser dicta door di Sr. T.E. van der Spoel, hues, asisti pa J. Spanner, registrador, ya ser firma dia 27 di januari 2025.

E rectificacion aki ta nifica cu Oduber por keda den Parlamento como lider di fraccion. Durante temporada di campaña prome cu eleccion, durante un debate politico, Oduber a indica cu si den caso e ser condena den cualkier forma, e lo retira como parlamentario.

Esaki el a ratifica tambe 22 di januari ultimo despues cu hues a dicta su sentencia. “Mi ta keda di opinion, tanten si tin un condena, si tin un straf, mi ta kere cu den parlamento, si nos kier duna respet na e organo aki mester por cuminsa na nos mes, esey ta e cambio den politica cu nos ta buscando,” el a indica.

No ta conoci ainda ki pasonan Oduber lo tuma, si lo apela of si lo retira. Segun ultimo informacion e lo a reuni cu su partido pa asina tuma un decision tocante si e lo keda representa PPA den parlamento of si e lo hala atras, manera cu el a bisa anteriormente.

Durante e sentencia di caso Flamingo hues a haya, a base di tur e pruebanan cu tin, cu Oduber tin cu haya un castigo di 365 dia di prizon di cual 319 dia ta condicional, y un periodo di prueba di tres aña. Esey kiermen cu 46 dia, cual el a sinta caba, esey e ta hay’e como castigo incondicional di prizon. Esaki ta nifica cu Oduber no mester bay KIA.

Ademas di e castigo di prizon hues a dicta cu Oduber ta haya castigo di trabou comunitario di 240 ora y si e no cumpli cu esaki e ta haya 120 dia cera.