Recientemente fraccion MEP den Parlamento di Aruba a manda un carta pa presidente di parlamento, Gerlien Croes, pidiendo un encuentro publico (OB) relaciona cu e cambionan fiscal anuncia pa minister demisionario di Finanzas, Xiomara Maduro na comienso di e aña.
Den e carta data 17 di januari, firma pa parlamentarionan Hendrik Tevreden, Edgard Vrolijk y Shailiny Tromp-Lee, fraccion MEP ta splica cu dia 7 di januari ultimo minister Maduro, a anuncia e cambionan fiscal cu ta encera cu entrante 1 di januari 2025 lo tin reduccion den e tarifa actual di injomstenbelaseting y loonbleasting.
Nan a indica tambe cu Parlamento di Aruba a ricibi un peticion di parti di minister Maduro den cual e mandatario ta indica cu e ta dispuesto pa bay parlamento pa splica tur e cambionan cu a tuma luga.
E peticion oficial di fraccion MEP ta pa yama un encuentro publico pa asina minister Maduro, hunto cu directora di Departamento di Impuesto, Luenne Gomez-Pieters duna un splicacion mas detaya tocante e cambionan fiscal aki.
No ta conoci si presidente di parlamento a aproba e peticion y a concede e reunion publico cu e fraccion a pidi, pero si ta conoci cu lider di fraccion MEP y prome minister demisionario Evelyn Wever-Croes lo mester presenta den parlamento diahuebs mainta den un encuentro publico pa duna un actualisacion tocante e situacion relaciona cu e Rijkswet.
