Ayera den un debate plenario di Tweede Kamer na Hulanda, e parlamentarionan a vota riba dos mocion entrega siman pasa, cu ta trata asuntonan di Reino, specificamente Aruba.

E prome tabata e mocion entrega pa parlamentario Raoul White y Suzanne Kroger (GroenLinks-PvdA), (36600-IV, nr. 43), tocante inventarisacion di loke ta necesario pa un maneho efectivo riba clima na e islanan di Aruba, Corsou y Sint Maarten.

E mocion ta nota cu Panel Intergubernamental riba Cambio Climatico (IPCC) ta indica cu estadonan isla chikito ya ta experimentando efectonan negativo significante di cambio climatico, a pesar cu e islanan aki a contribui minimal na su causanan, y considerando cu Aruba, Corsou y Sint Maarten tambe ta enfrenta retonan significante pa atende e efectonan negativo di cambio climatico, ta pidi gobierno pa evalua ki medida adicional ta necesario pa un politica di clima efectivo pa e islanan aki y pa compartie cu Parlamento.

Ayera, parlamentarionan di SP, GroenLinks-PvdA, PvdD, DENK, Volt, D66, NSC, ChristenUnie, SGP, y CDA a vota na fabor di e mocion, mientras miembronan di e otro fraccionnan a vota contra. E mocion a keda aproba.

E otro mocion tabata di parlamentario Aukje de Vries (VVD), tocante un maneho mas fuerte pa combati corupcion, fraude y criminalidad den gobernacion na e islanan CAS.

E mocion ta considera e casonan den cual oficial y politico na Corsou, Aruba y Sint Maarten a bira sospechoso of a keda condena pa corupcion, abuso di funcion, labamento di placa, etc., y tambe ta considera cu a tuma medida pa combati crimen subversivo, corupcion y nepotismo, pero ta nota cu e esfuersonan aki no a duna suficiente resultado. E mocion ta solicita pa gobierno, den su maneho nobo pa bon gobernacion den prome mita di 2025, implementa un strategia y medidanan mas fuerte den areanan di prevencion di fraude, combati crimen subversivo, combati corupcion y promove integridad, cu efecto y resultado tangible, y vincula consecuencia concreto na e medidanan aki si nan ta proba insuficientemente efectivo.

Parlamentarionan di SP, de SGP, CDA, VVD, BBB, JA21, FVD y PVV a vota na fabor di e mocion aki, mientras e otro fraccionnan a vota contra, y asina e mocion a keda aproba.

Potret di archivo.