E Conferencia di Partidonan di Convencion di Conseho di Europa riba Labamento, Buskeda, y Confiscamento di Producto di Crimen y riba Financiamento di Terorismo a publica revisionnan actualisa di monitoreo tematico evaluando, pa prome biaha, cumplimento di Aruba cu varios provision di tratado. Den e articulo aki, e resultadonan di e rapport pa Aruba.

Segun e Convencion a indica riba su website, e rapportnan ta evalua e implementacion di e provisionnan cu ta concerni e reversion di e deber di prueba den confisca producto, e maneho di e propiedad congela of confisca, monitoreo di operacionnan di banco como un modo di investigacion, e crimen di labamento di placa, responsabilidad corporativo, recidivismo internacional, posponemento di transaccion sospechoso, y comparti y debolbe propiedad confisca. Nan ta contene recomendacionnan pa ambos hurisdiccion pa mehora cumplimento cu e provisionnan di e Convencion.

E evaluacion di Aruba a keda ehecuta despues di un decision di Hulanda pa acepta aplica e tratado na e hurisdiccion aki.

Propiedad confisca
 E evaluacion riba Articulo 25 (2) ta indica cu, for di e contesta cu a duna na e cuestionario 2024, ta bira evidente cu no tin medida legislativo na vigor na Aruba cu lo permiti nos pais duna consideracion di prioridad pa debolbe e propiedad confisca na e Partido Estatal cu solicita esaki, pa asina por duna compensacion na e victimanan.

Riba Articulo 25 (3) di e evaluacion, ta bisa cu autoridadnan di Aruba a declara cu Articulo 579a di CCrPA ta stipula e posibilidad di activonan confisca comparti cu otro paisnan. Sinembargo, e provision aki no ta atende necesariamente e habilidad di autoridadnan pa negocia acuerdo pa comparti activo.

Den nan contesta pa e cuestionario, autoridadnan Arubano a indica cu e activonan por ser comparti riba un base ad hoc of basa riba un acuerdo. En practica, asina cu autoridadnan ta ricibi un solicitud di un estado stranhero, ta tuma un decision y ta yega na un acuerdo riba comparti 13 activo, sea igual (50/50) of basa riba e naturalesa di e solicitud (por ehemplo, den casonan involucrando restitucion.)

Autoridadnan a indica cu nan, bao amiendanan legislativo recien, por aplica e acuerdo conclui entre Hulanda y Merca na Aruba. E acuerdo aki ta provee e posibilidad pa comparti activonan den caso unda e partido solicitante a asisti den investigacion of procedura di confiscamento. Mientras cu e provision aki ta facilita, na cierto grado, pa comparti activo, su alcance ta menos cu esun rekeri pa Articulo 25 (3).

Autoridadnan no a duna casonan ehemplo of estadistica riba implementacion efectivo di Articulo 25 (2) y (3).

Mirando cu no tin un provision legal explicito cu ta coresponde Articulo 25 den legislacion domestico, e Convencion ta recomenda pa autoridadnan di Aruba introduci den nan marco legal e principio di intercambio di activo cu proposito di compensacion di victima, y debolbe propiedad na e doño legitimo. Ademas, mester empodera autoridadnan competente pa negocia y cera acuerdo cu ta duna consideracion special na intercambio di activo.

Decisionnan anterior
 Legislacion Arubano ta indica cu mester tene decisionnan anterior den consideracion na momento cu ta determina un castigo. Articulo 1:117 di CrCA ta bisa cu e duracion di un sentencia di prison ta keda aumenta cu un tercera parti, y e multa imponi ta bay ta mas halto, pa un crimen cometi dentro di cinco aña di un condena anterior pa un ofensa similar. E provision aki ta aplicable na e ofensanan estableci di acuerdo cu e Convencion.

Mientras cu e provision no ta bisa nada si ta solamente condenanan otorga domesticamente ta bay ser considera na momento di determina e castigo, autoridadnan a conseha pa corte tene den cosnideracion datonan conteni den e dossier criminal. Ademas, Articulo 1 di Regulacion pa registro di dossier criminal stranhero (AB1990 GT 75) ta stipula cu extractonan di e dossier criminal di condenanan otorga pa cortenan den exterior por keda inclui, tanten cu nan cumpli cu cierto condicion. Sinembargo, autoridadnan no a duna mas informacion riba e condicionnan necesario pa por registra e condena den exterior den e dossier criminal.

Den su recomendacionnan riba e tema aki, e Convencion ta nota cu legislacion Arubano a introduci algun elemento di Articulo 11. Sinembargo, no ta cla cu tur e decisionnan final contra personanan natural y legal otorga na paisnan den exterior ta bay keda considera na momento di determina un castigo. Pa e motibo aki, ta recomenda autoridadnan pa considera introduci medidanan legislativo of otro cu ta stipula claramente cu recidivismo internacional por ser tuma na cuenta na momento di determina un castigo.

Labamento di placa

Relaciona cu Articulo 9 (3), e Convencion ta nota cu bao legislacion criminal di Aruba, e ofensa di labamento di placa ta criminalisa den Articulonan 2:404 y 2:406 di CrCA.

Articulo 2:404 di CrCA ta defini e ofensa intencional di labamento di placa na momento cu esun cu ta comet’e “sa of ta compronde” cu e propiedad laba ta bin directa- of indirectamente for di productonan di cualkier crimen.

Segun Articulo 2:406 di CrCA, e rekisito pa e elemento mental di ofensanan di labamento di placa ta cu esun cu comet’e tabatin “causa rasonable pa sospecha” cu e obheto tabatin un origen ilegal.

Tocante implementacion efectivo, e Convencion ta nota cu autoridadnan no a presenta ningun caso como ehemplo pa demostra e aplicacion di e elemento mental menor relaciona cu un ofensa di labamento di placa.

Den su recomendacion, e Convencion ta indica cu e legislacion di Aruba ta inclui e nocion di un elemento mental menor pa establece un ofensa di labamento di placa, pero no tin caso ainda riba su aplicacion. Pues ta recomenda pa autoridadnan considera aumenta conscientisacion entre autoridadnan den cadena legal y e hudiciario tocante e elemento mental menor relaciona cu e ofensa di labamento di placa.

Den nos siguiente edicion, Bon Dia Aruba ta bay trata e resultadonan di e rapport relaciona cu monitoreo di operacionnan bancario, poder y tecnica di investigacion, responsabilidad corporativo, y mas.