Ayera mainta den Parlamento di Aruba a tuma luga un reunion publico pa trata e adopcion di e plan organisatorio y di formacion y concepto di contrato laboral di acuerdo cu articulo 13 di e Ley di Ombudsman. E plan y concepto a keda aporba unanimamente cual ta nifica cu e Ombudsman por inicia e proceso di busca personal y asina cuminsa eherce su trabounan manera ley ta prescribi.
Prome minister demisionario y lider di fraccion MEP den Parlamento di Aruba, Evelyn Wever-Croes, a splica cu e ley pa un Ombudsman pa Aruba a cuminsa cana su caminda na aña 1997. Desde e aña ey a cuminsa explora e posibilidadnan pa Aruba haya su Ombudsman y na aña 2005 tabatin un concepto di ley cu a ser entrega na Parlamento di Aruba.
Despues cu e parlamentarionan cu a entrega e iniciativa di ley a sali di parlamento, Wever-Croes, hunto cu Booshi Wever, a tuma over e iniciativa y a purba bin cu e ley di Ombudsman pero no a haya e cooperacion cu tabatin mester.
El a sigui splica cu despues a dura te ora cu MEP a drenta den gobierno na 2017 y a pone esaki como un di e puntonan di prioridad pa Aruba, como e unico pais den reino sin Ombudsman, pa tambe haya su Ombudsman.
E mandatario a indica cu dia 9 di september 2020 Aruba a haya suley di Ombudsman. Sinembargo, el a agrega, na mesun momento tabata kier ancra e ley di Ombudsman den Constitucion pa asina ningun gobierno den futuro kita esaki for di Aruba, principalmente mirando e falta di cooperacion cu tabatin pa por a bin cu Ombudsman prome cu esey.
E cambio di Constitucion aki a ser trata na februari di 2021 den parlamento, a ser posponi y dia 10 di maart 2022 el a bolbe ser trata den parlamento e tempo ey, cu tabata consisti di un constelacion diferente.
“Ami ta considera esaki un dia scur pa henter Aruba. Ora cu e ley pa ancra nos Ombudsman den Constitucion no por a haya e sosten cu e tabatin mester pa asina awe nos por ta orguyoso di berdad. No solamente cu nos tin un Ombudsman pero cu nos tin’e ancra den no Constitucion,” el a subraya.
Wever-Croes a splica cu no tabatin e sosten di e dos tercera parti di parlamento pa aproba e cambio di Constitucion. Coalicion tabata sostene e ley aki, cual tabata na e momento ey 11 voto na fabor, pero pa ancra algo den Constitucion tin mester di 14 voto na fabor y esey no tabatin den e constelacion di parlamento anterior. “Mi deseo ferviente ta pa e parlamento aki si por yega na ancra e posicion di Ombudsman den nos Constitucion,” el a enfatisa.
El a splica cu e cambio di ley cu a ser proponi na 2021 no tabata solamente pa ancra e Ombudsman den Constitucion di Aruba, si no tambe cierto procesonan di Raad van Advies cu mester ser ancra den Constitucion y duna nan mas independencia, introduccion di Ombudsman y tambe tabata inclui ancra den Constitucion e normanan financiero cu tin mester pa percura cu pais Aruba ta keda ser maneha den futuro tambe segun normanan financiero responsabel.
Fraccion MEP a haya cu e hecho cu no por ancra e ley aki den Constitucion algo inaceptabel y eora dia 23 di januari di 2023 un ley di iniciativa a ser entrega y trata den parlamento. E iniciativa di ley aki a ser adopta y acepta caminda cu a regla e nombramento y retiro di e Ombudsman y e Kidnerombudsman y cu esey a trabounan por a continua pa e nombramento di e Ombudsman.
Dia 1 di october 2024 sra. Jurima Bryson a keda nombra como e prome Ombudsma di Aruba.
Wever-Croes a indica cu mayoria di e trabounan a ser encamina y ta ancra legalmente y huridicamente den ley cu por tin un ombudsman. A percura pa tin un presupuesto pa e Bureau di Ombudsman por funciona den 2025, cual ta inclui den e presupuesto di 2025.
El a agrega cu a traves di e kwartiermaker cu a ser institui pa parlamento a traha riba e procesonan financiero, a traha riba huisvesting, unda e Bureau di Ombudsman mester ser ubica, a traha tambe riba e procedura di keho y a traha riba e parti di personal.
E mandatario a splica cu e plan y concepto di formacion pa e Ombudsman, cu a ser traha hunto cu e departamentonan di gobierno pa por yega na un structura y un ocupacion di e Bureau di Ombudsman manera cu tin mester segun e mision y vision ancra den ley.
Una bes cu e rapport wordo determina e ora e Ombudsman por cuminsa busca e personal pa asina nan por cuminsa traha manera cu ley ta prescribi.
Pa loke ta e cambio pa ancra e Ombudsman den Constitucion di Aruba, lider di fraccion MEP a indica cu su fraccion lo presenta na parlamento un iniciativa pa ancra e Ombudsman den Constitucion manera e ta den tur parti di Reino. El a indica cu pa fin di luna e fraccion lo keda cla cune y lo presenta esaki na Parlamento di Aruba. “Ohala por conta riba sosten di dos tercera parti cu ta 14 por lo menos pa ancra e Ombudsman den Constitucion,” el a resalta.
Di parti di otro fraccionnan no tabatin ningun pregunta tocante e plan organisatorio y di formacion y concepto di contrato laboral di e Ombudsman. A base di e conseho di e Comision Central, cu tur parlamentario a ricibi,uninamimante a aproba e formatie plan pa Ombudsman por cuminsa e proceso di busca personal pa cuminsa oficialisa e trabounan cu tin cu bay ehecuta.
