Manera ta conoci despues di su huramentacion como presidente di Merca, Donald Trump a duna orden pa suspende ayudo financiero mundial, pa un periodo di 90 dia, lo afecta Aruba, y Corsou, tambe.
Pan American Development Foundation (PADF), cu oficina na Aruba y Corsou, ta un di e organisacionnan cu ta ricibi placa for di Merca. Segun e director di e fundacion, Raynel Martis, a informa e medio Antilliaans Dagblad, e suspension di e ayudo financiero tin un efecto pa ambos isla.
Segun e portal ta indica e ayudo financiero di PADF tabata di un suma di alrededor di 200 mil dollar cual e fundacion tabata reparti den diferente otro organisacion. E director di e fundacion, cu ta maneha e oficina di Aruba como esun di Corsou, no a duna mas informacion tocante e topico.
PADF ta traha den henter Latino America y Caribe, den areanan urbano y rural, fortalece e comunidadnan. Nan ta sirbi e comunidadnan mas vulnerabel y ta partner cu e sector publico y priva y sociedad civil pa progreso significante y sostenibel.
Nan esfuerso ta enfoca den reduci vulnerabilidad, atende necesidadnan inmediato, y fortalece capacidadnan di enfrentamento di poblacionnan vulnerabel, specialmente esnan afecta pa peligernan natural y emergencia humanitario compleho, y tambe victimanan di violencia basa riba genero, hobennan na riesgo, migrante, minoria y comunidadnan rural, y otronan.
No ta cla ainda con e suspension di ayudo financiero internacional cu Trump a impone lo afecta Aruba of si esaki lo tin consecuencia pa proyectonan cu e fundacion aki tabatin den plan pa eherce na Aruba.
