E relacion entre Aruba y Royal Schiphol Group ta bao presion significante. E conflicto entre e gabinete demisionario di Prome Minister Evelyn Wever-Croes (MEP) ya a alcansa un punto critico, cu Schiphol Group menasando di bandona Aruba na juni proximo.

Esaki a keda reporta riba portal noticiero Aruba.nu. Segun e relato, lider di AVP, Mike Eman a expresa preocupacion pa e impacto potencial cu e retiro di Schiphol Group lo tin riba e posicion economico y strategico di Aruba.

Desde april 2004, Royal Schiphol Group, propietario y operador di aeropuerto Schiphol na Amsterdam, a mantene un relacion strategico cu Aruba Airport Authority (AAA), cu ta maneha Aeropuerto Internacional Reina Beatrix. A traves di e colaboracion aki, Royal Schiphol Group ta provee management y sosten tecnico na aeropuerto di Aruba.

Segun e relato di Aruba.nu, den un carta manda december ultimo, Schiphol Group a anuncia su intencion pa termina e acuerdo, citando un relacion afecta severamente cu gobierno di Aruba. Eman ta atribui e conflicto aki na minister demisionario di Turismo, Dangui Oduber (MEP), acusando e minister di permiti pa e conflicto escala. E ta nota cu e relacion aki tabata estableci na 2004 pa un gobierno anterior di MEP, lidera pa Nel Oduber.

Schiphol a hunga un rol clave den desaroyo di Aeropuerto Reina Beatrix, mehorando profesionalismo, innovacion y eficiencia. Eman ta enfatisa cu retiro di Schiphol Group lo ta un perdida significante, declarando cu e gabinete interino aki ta poniendo den peliger un di e proyectonan colaborativo mas grandi di su administracionnan.

E tambe a resalta e perdida di otro asociacionnan clave bao gabinetenan Wever-Croes, incluyendo esnan cu TNO, Rietveld Academy y Port of Amsterdam. Eman ta describi esaki como un tendencia lamentable cu ta mina e posicion economico di Aruba y ta daña e clima di inversion.

Eman a urgi e gabinete demisionario pa tuma accion rapido pa drecha e relacion cu Schiphol, advertiendo cu ta iresponsable pa carga e gabinete entrante cu e consecuencianan di un asociacion daña.

Reaccion di minister Dangui Oduber
 Di su banda, minister demisionario Dangui Oduber a tuma nota di e relato cu a aparece riba rednan social y den medionan di comunicacion local. Den un reaccion cortico riba su pagina di Facebook, el a aludi na e hecho cu lo tin motibonan hopi serio pakico e relacion cu Schiphol Group no por a continua.

“Lo ta bon pa co-formador Eman splica tambe kico ta e condicionnan cu Schiphol a pone pa nos cu a conduci na e patstelling cu negociacionnan a tranca! Un patstelling similar na e negociacion entre AVP y Futuro,” e minister a indica. “Si e no kier splik’e cu gusto lo mi splica cu tur luho y detaye pakico NO por acepta e condicionnan di Schiphol cu ta bay hopi leu!”

Reaccion di Nel Oduber
 Manera menciona, e partnership cu Schiphol Group a cuminsa originalmente bao mando di ex-prome minister di MEP, Nelson Oduber na 2004. Siguiendo e sucesonan den noticia, e ex-mandatario tambe a duna un reaccion riba su rednan social.

Den un mensahe largo, el a indica cu “mi ta kere cu Dangui mes lo por splica kico ta pasando exactamente.”

Sinembargo, el a dirigi critica na e lider di AVP. “Locual mi ta haya straño si ta cu un informador cu tin dos luna ta discutiendo partimento [di] cos, puesto y contratonan a-la ‘PPP-projecten’ y con por hunga ‘Futuro’ den prensa; bisando ta cos so nan ta pidiendo culpando nan di tur cos!!! En bes e ocupa su mes cu e partimento [di] cos y colocacion di nan hendenan, contratonan miyonario pa sponsor den nan famoso ‘fondonan di yuda nan mes y nan hendenan’ y complaciendo e ‘old school boys’ den AVP cu no kier move ni cu “bom” cu tine e menasa di bay laga cas; awor Mike ta ocupa su mes cu Schiphol Group,” Nel Oduber a skirbi.

Oduber a sigui splica cu tempo cu el a drenta gobierno na 2001, “nos a haya nos cu un renobacion y ampliacion di un aeropuerto, unda manera custumber di gobiernonan di AVP nan a bay fia placa di un grupo segun mi na New York, unda a saca bononan.” Oduber a sigui splica cu gabinete Eman a pone den e contrato cu ora AAA NV no por paga nan, e debe ey ta ser converti den accion pa e grupo den e NV, “cu consecuentemente nan lo por bira hasta doño di nos airport.”

Oduber a sigui splica cu tempo cu su gabinete tabata den gobierno, “a resulta cu e dak airport tabata lek cu si bo para pafor bo lo muha menos.” Tambe e bañonan tabata yena lagando mal holor, y e aeropuerto “tabata manera un piscina.” Oduber a indica cu di esaki tin evidencia den forma di grabacion y publicacion.

“A resulta cu airport tabata perde hopi placa y e bondholders a pone AAA NV den ‘default.’”
Segun Oduber, e ora a bin cu un delegacion grandi cerca su gabinete, cu ta doño di e aeropuerto, y a menasa nan cu si nan no haya nan placa, nan lo tuma e debe cu tin den forma di accion. “Consecuentemente nan lo por bira doño” di e aeropuerto.

Segun Oduber, a traves di bon contacto na Hulanda el a dicidi pa acerca Schiphol Group pa puntra nan si nan kier a bin maneha e aeropuerto y a splica nan tur e problemanan. E grupo aki tabata maneha hasta parti di aeropuerto di New York y varios otro pais, segun Oduber a splica, y asina a negocia y trece e grupo na Aruba. “Den menos cu 2 aña cu nan a bin nan a yuda drecha e desaster di e dak, bañonan, etc. y AAA NV a cuminsa gana placa, unda hasta gobierno a haya parti di e ganashi.” Oduber a indica cu e tempo aya, AVP den oposicion a critica e contrato, criticando cu e director su salario tabata demasiado halto, pero despues na 2009 ora AVP a yega gobierno nan “a brasa Schiphol Group y no a cambia nada nada na e contrato.”

“En vez di duna credito na nos cu a scapa Aruba di por a keda doño di airport, awor ta bolbe ataca ministro Dangui cu e lo kier core cu Schiphol Group etc. sin busca informacion kico ta pasando exactamente,” Oduber a skirbi, agregando cu e no sa e detayenan di kico precies ta sucediendo.

Sinembargo, el a bisa cu un par di aña pasa el a recomenda gobierno pa re-negocia e contrato, evaluando si ainda ta beneficia ambos banda y si tin balor agrega pa Aruba.

Na final, Oduber a conclui recomendando Eman pa “keda leu pa mi no bolbe recorda bo e aventuranan di boso airport cu a costa pueblo un dineral.”