Gabinete Hulandes kier bin cu plan den dos luna pa combati e crisis di nitrogeno: ‘Un problema serio’

(NU.nl) – E urgencia di e crisis di nitrogeno a bira cla pa Gabinete Hulandes despues di dos decision di hof. Prome minister Dick Schoof, hunto cu un grupo di diesun minister, kier bin cu un plan pa ataca e problema den dos luna.

E problema di nitrogeno ya tabata serio, pero e situacion a bira mas grave e ultimo lunanan aki cu a pasa. For di 2019, e proceso pa otorga permiso pa proyecto di construccion of ampliacion di negoshi ta bay hopi poco poco. Den area cerca di naturalesa fragil, pa cinco aña caba ta casi imposibel pa haya permiso.

Sinembargo, no ta henter e pais ta afecta. Pero, e gabinete tin miedo cu esey lo bay pasa awo. Esaki ta despues di un decision di hof December pasa. E miembro di gobernacion mas halto di hof a cancela e sistema di “intern salderen”, unda tabata posible pa redistribui espacio di nitrogeno. Esaki tabata un metodo cu provincia na Hulanda por duna permiso di naturalesa.

Por ehempel, un criador di bestia cu no tabata usa un parti di su permiso tabata por a amplia su tereno cu e parti di permiso cu e no a usa ainda. Tambe hopi proyecto di caminda y construccion tabata aproba a base di “intern salderen”. Pero awor, cu decision di hof, esaki ta para y lo tin consecuencia grandi.

E gabinete ta evalua e impacto di e decision di hof awor. Un comision special di minister, lidera pa e prome minister, ta examina ki posibilidadnan tin ainda. Schoof a indica na e rueda di prensa semanal cu no tin duda: “Nos tin un problema hopi serio.” E comision lo traha “cu tur nan forsa riba un plan.”

Plannan lo keda cla den dos luna

E meta di Schoof ta cu e plannan pa reduci nitrogeno lo ta cla den dos luna, pa por presenta e pakete na parlamento. Tempo ta core, pasobra e emision di nitrogeno ta sigui subi hopi. Un par di aña pasa e gabinete y Tweede Kamer a establece un meta den ley: pa 2030, mitar di e naturalesa sensible pa nitrogeno no por ser “overbelast” y sufri mas.

E siman aki, hof a dicidi cu e Estado tin cu cumpli cu e meta aki. Pa logra esaki den cinco aña, e gabinete tin cu traha duro, pasobra Hulanda no ta na bon rumbo pa cumpli cu e meta. Tambe, minister di agricultura, Femke Wiersma, a cancela gran parti di e politica di su predecesor, cu ta agrega mas complicacion pa e situacion.