(AP) — Un esteticista di Manhattan, Joey Grant Luther, a ser acusa diaranson anochi di inyecta clientenan cu Botox falso na su spa medico den bicindario di Hell’s Kitchen, despues cu algun di nan a reporta cu nan ta sinti nan mes malo.
Autoridadnan federal ta indica cu algun victima cu a ricibi inyeccion entre 2021 cu juli di 2024 a sufri heridanan serio cu ta pone nan bida na riesgo.
Luther, 54 aña, cu no tabatin licencia pa duna inyeccion di Botox, ta enfrenta acusaccionnan di ‘wire fraud’, contrabando y otro delitonan relaciona cu medicamento falsifica y mal etica. Segun autoridadnan, Luther tabata importa Botox falso for di paisnan Asiatico, incluyendo China, entre april 2023 y juli 2024.
Luther a ser libera bou di un fiansa di $100,000. Un mensahe a ser manda na su abogado pa comentario.
Fiscal Danielle R. Sassoon a bisa cu Luther tabata sigura su cliente cu e Botox falso cu e la cumpra for di China tabata original. E ta indica tambe cu e la sigui inyecta e producto falso hasta ora e tabata sa cu su clientenan tabata desaroyando sintoma straño of tabata sinti nan malo.
“E falta di consideracion di Luther pa e bienestar di su clientenan a pone tur su victima den peliger y, den algun caso, a causa heridanan cu tabata pone nan bida na riesgo,” Sassoon a declara.
Segun documentonan di corte, un di su patientenan a ser diagnostica cu botulismo na Maart 2023, despues di a ricibi un inyeccion na su negoshi un luna prome. E patient tabata sinti sinttomanan manera bista dobel, sinti marea, dificuldad pa guli, palpitaccion di curason, lenga pisa y te hasta e no por a lanta su brasa.
Luther tabata gaña cllientenan, bisando cu cualkier efecto secundario cu nan sinti lo ta temporal y cu nan no mester preocupa. E tambe tabata garantisa nan cu e no tabata usa Botox falso, mientras e tabata sa cu esaki no tabata berdad.
Durante un inval na maart 2023 ariba e negoshi di Luther, investigadornan a descubri cu por lo menos 700 cita tabata registra pa Botox.
