Proceso di formacion di gobierno ta andando, pero manera ya caba Bon Dia Aruba a publica anteriormente tin falta di informacion riba esaki, locual ta trece preocupacion den comunidad. Recientemente un medio di comunicacion local a publica cu e proceso di formacion lo a tranca y cu e partidonan no ta logra yega na otro. Lider di partido Futuro y co-formador Gerlien Croes a reacciona riba e informacion aki di un manera sorprendi.

Segun informacion cu ta circula tanto den medio como riba rednan social e proceso di formacion di gobierno entre partido AVP y partido Futuro a tranca y cu partido AVP lo a duna Futuro un ultimatum di 48 ora pa recapacita.

A traves di un publicacion riba su pagina di Facebook oficial Gerlien Croes a indica cu manera ta conoci, Futuro ta den proceso di negociacion cu partido AVP, mientras cu na mesun momento el a sigura cu partido Futuro no a ricibi ningun ultimatum for di partido AVP.

“Dialuna ultimo Futuro a tene, un bes mas, reunion oficial fisico cu e ekipo di negociacion di partido AVP; y entre diamars cu diaranson tabatin comunicacion telefonico. Partido AVP y/of Sr. Eman, te cu awor, na ningun momento a informa partido Futuro of mi persona, como lider di partido y co-formado, cu nan a presenta un ultimatum na partido Futuro pa cu e negociacionnan cu ta andando, ni tampoco a confirma cu oficialmente tin un impasse,” Croes a menciona.

El a señala cu te na e momentonan aki Futuro tambe ta tuma nota di e publicacionnan den media, pero cu e partido ta kere den mantene e comunicacion profesional y solamente a traves di e liñanan oficial.

“Nos ta sigui prepara pa continua sinta na mesa manera tur dos partido oficialmente a haya encargo di Gobernador di Aruba. Nos ta pendiente di confirmacion of rectificacion di e noticianan publica,” el a finalisa su publicacion.

Manera ya caba ta conoci na final di december partido AVP y Futuro a firma un declaracion di boluntad pa forma siguiente gobierno. Informador di e proceso, sra. Tisa LaSorte a presenta su relato final na Su Excelencia Gobernador di Aruba Alfonso Boekhoudt, den cual ta conclui cu partidonan AVP y Futuro conhuntamente kier forma un coalicion.

A base di su resultadonan despues di su proceso di investigacion tocante cual opcion tin pa forma un gabinete y e reunionnan cu lidernan di partido cu a ricibi asiento durante eleccion parlamentario di dia 6 di december di ultimo, LaSorte a conclui cu e dos partido aki, Futuro y AVP ta dispuesto pa forma un coalicion y a firma un declaracion di boluntad.

Despues di esaki, dia 14 di januari Gobernador di Aruba a apunta oficialmente Gerlien Croes y Mike Eman como formador y a encarga nan cu e formacion di un gabinete stabiel cu tin confiansa di e fraccionnan di AVP y Futuro den Parlamento y cu ta consisti di personanan cu ta dispuesto y capaz pa implementa un maneho financiero-economico solido, cu atencion pa costo di bida na Aruba.

Parti di e encargo di formacion ta trahamento di un acuerdo di gobernacion entre AVP y Futuro y un reparticion di cartera denter di e gabinete nobo. Finalmente, e eligibilidad di candidatonan pa e funcion di minister y di minister plenipotenciario mester wordo evalua previamente a base di e exigencianan y proceduranan stipula den e “Landsverordening integriteit ministers”.

Ya casi ta bay cumpli dos siman desde cu Eman y Croes a ser encarga cu e tarea aki ya cuminsa cu e proceso di negociacion. Durante e dos siman aki tabatin un silencio pa loke ta e proceso di negociacion di formacion di gobierno, algo cu tanto ciudadanonan como tambe politiconan a tuma nota di dje y a expresa nan preocupacion pa cu esaki.

Rumornan cu tabata circula a indica cu tin un impasse entre e partidonan pa motibo di e hecho cu lider di partido Futuro, Gerlien Croes, kier reduci e cantidad di ministerio na siete ministerio, mientras cu partido AVP kier mantene e mesun cantidad, esta nuebe ministerio.

Segun e ultimo publicacion di Croes, partido AVP no a confirma cu tin un impasse y cu Futuro ta sigui prepara pa continua sinta na mesa pa continua cu e negociacionnan.

Mas detaye di e proceso di formacion no ta conoci y comunidad di Aruba tin expectativa halto pa loke ta e formacion di e gobierno nobo aki. E falta di informacion ta crea incertidumbre pa loke ta e futuro di e formacion di gobierno.

Algun ciudadano tambe ta cuestiona si acaso e dos partido yega na un acuerdo y forma un coalicion, con fuerte e coalicion aki lo ta enberdad y con largo e lo dura si for di inicio caba tin problema di comunicacion, cual ta un base principal den un negociacion asina importante, y falta di tumamento di decision.