Recientemente durante un reunion di Tweede Kamer, parlamentarionan Hulandes a introduci un mocion den cual ta busca un maneho mas fuerte pa combati corupcion y mal gobernacion na Aruba, Corsou y Sint Maarten. Esaki despues di cantidad di caso den cual politico y oficialnan di e islanan a haya nan mes involucra den casonan penal.

Den ultimo debate di Comision di Asuntonan di Reino den Tweede Kamer, parlamentario Aukje de Vries di VVD a expresa preocupacion pa varios instancia cu nan ta considera “inaceptable” den e parti Caribense di Reino. Entre otro, el a resalta cu a aresta un minister na Aruba pa participacion den fraude relaciona cu permiso di trabao y residencia. Por asumi cu e lo ta referiendo na ex-minister Glenbert Croes. El a bisa cu un ex-minister di Aruba ta enfrentando un sentencia di prison incondicional di tres aña pa soborno, fraude y abuso di su cargo, posiblemente referiendo na Benny Sevinger den caso Avestruz.

De Vries a menciona tambe cu un ex-parlamentario na Sint Maarten a keda sentencia cu diesocho luna di prison pa cumpra voto durante eleccion. Y na Corsou, un di e lidernan di un partido politico ta cera bao sospecha di labamento di placa durante eleccion. El a bisa cu den su opinion, esaki no por sucede den Reino Hulandes, y pa e motibo aki, a introduci un mocion.

Mocion

“E camara, despues di a scucha e deliberacion, considerando cu recientemente tin multiple instancia unda oficial y politico na Corsou, Aruba y Sint Maarten ta sospechoso of condena pa corupcion, abuso di funcion, labamento di placa, etc.; considerando cu a tuma medida pa combati criminalidad, corupcion y nepotismo, pero cu te awo esakinan a duna resultado insuficiente; keriendo cu reforsa cumplimento di ley, estado di derecho, y integridad di gobierno na Aruba, Corsou y Sint Maarten mester ricibi un prioridad mas halto; keriendo cu tur isleño merece bon gobernacion cu ta sirbi nan na lugar di interes propio; ta solicita gobierno pa, den e maneho nobo pa bon gobernacion, duna prioridad den prome mita di 2025 na un esfuerso y medidanan mas fuerte den areanan di prevencion di fraude, combati criminalidad, combati corupcion y promove integridad cu ta duna efecto y resultado tangible, y si esakinan ta insuficiente, tambe mara consecuencianan concreto na nan.” E propuesta aki tin number 45 (36600-IV).

Reaccion di Secretario di Estado

Durante e debate, Secretario di Estado Zsolt Szabo a comenta riba e mocion 45 di De Vries bisando: “Si, mi ta comparti su meta pa un maneho mas fuerte. Aresto y condenanan reciente tabata posible door di inversion den RST y Ministerio Publico. Sinembargo, mi ta di acuerdo cu tin mas oportunidad pa reforsa e maneho aki. Manera declara anteriormente, mi ta bay presenta un plan mas robusto contra criminalidad den consulta cu Minister di Husticia y Seguridad y e paisnan prome cu dia 1 di maart. Mi tambe ta trahando riba un agenda di bon gobernacion, cu ta bay keda comparti den spring y ta bay inclui integridad como un componente clave. Mi politicanan ta bay ta enfoca riba efectividad, y pues mi tambe ta recomenda e mocion aki den e Camara.”

Votacion

Na final di e debate, a dicidi cu e comision ta bay vota riba e mocion aki – y otronan presenta durante e debate – riba diamars 28 di januari.