(AP) – Turtuganan maritimo ta keda surgi morto na costa di India y ambientalistanan cu autoridadnan ta purbando di para e cantidad aki di 600 caba y preveni un aumento.
E cantidad halto di morto di turtuganan na Chennai India ta mas probabelmente a causa di sobrepesca cerca di e costa, unda e turtuganan accidetntalmente ta pega den e netnan segun e expertonan. Esaki a causa discusion y rabia den e region tocante con por evita e mortonan. Sinembargo e piscadonan ta bisa cu e condicionnan mas precario – for di awa mas cayente te na gastonan di operacion aumentando – a pusha nan den un skina. Oficialnan di gobierno y e costa ta bisa cu nan a intensifica e monitero di pesca ilegal desde cu a cuminsa mira tasa di fayecimento halto den e turtuganan.
E cantidad mas halto di turtuga cu a haya morto desde 2014, ora cu 900 turtuga a ser haya morto na costa sur di India.
Piscadonan den e ciudad ta bisa cu bientonan y awanan turbulento a haci mas caro y dificil pa biaha muchu leu di costa. “Cu prijs di petroleo aumentando, nos ta gasta cerca di 5,784 dollar cada biaha cu nos manda nos botonan pisca,” M.E Raghupathi, residente di Chennai cu tin 52 aña ta pisca a comenta. “Nos ta adora e turtuganan y e ta causa nos dolor tambe cu asina hopi ta muriendo, pero nos tin cu provee pa nos famia tambe,” el a expresa.
Raghupathi, ken anteriormente tabata presidente di un asociacion di boto den henter e estado, a bisa cu e tecnologia usa den e botonan y e netnan ta diseña pa organisacionnan cu sosten di gobierno. Pero e diseñonan aki tin desde 1960 sin actualisa. “Nos ta contento y dispuesto pa usa cualkier otro tecnologia cu por yuda preveni e morto di e turtuganan si provee esaki na nos,” el a declara.
Otro piscado, K. Barathi, a bisa cu e piscanan den e region aki di Bay of Bengal a disminui exponencialmente den e ultimo decada a causa di calentamento di e awa a causa di cambio di clima y pesca den exceso. “E pisca cu nos tabata mira aki 25 aña atras no tey mas y no tey mas, esaki ta e motibo primario dicon e botonan awo tin cu bay luganan unda nan no mester bay,” el a bisa. “E medidanan pa aumenta recursonan di pesca manera crea coral reef artificial por yuda evita e competencia aki y tambe indirectamente proteha e turtuganan.”
Varios estudio conduci pa cientificonan di clima a haay cu e riesgonan di ciclon mas intenso y frecuente a aumenta na costa di India como resultado di calentamento global.
Un ordo di gobierno local a ser aproba den 2016 pa stop e botonan di usa net gigante cu ta bay cu tur cos riba vloer di oceano di drenta den 5 mia nautico di e costa durante temporada cu turtuga ta crea nest. E ley tambe ta obliga uso di e dispositivonan conoci como ‘turtle excluder devices’ cu por yuda e turtuganan scapa net.
Oficialnan di gobierno a intensifica e actividadnan di proteccion di turtuga den simannan recien, segun Manish Meena, e ciudad su protector di bida salbahe.
“Nos tur ta na alerta halto y nos ta purbando di conscientisa e piscadonan pa asina nan libera cualkier turtuga cu pega den nan net. Tur agencia di gobierno ta abordo di esaki y ta purbando di traha hunto pa atende e situacion aki,” el a declara.
Meena a declara cu autoridadnan tambe ta encurasha e uso di ‘turtle excluder devices’ cual ta crea di baranan di metal cu ta pone na e nek di e net di boto. Sinembargo Raghupathi a bisa cu pisca tambe por scapa ora cu instala dispositivo riba e netnan. “Mester tin otro solucionnan manera instala camara den nos net of otro cos cu no ta afecta e piscanan cu ya caba ta disminuyendo.”
Despues di rapportnan den media tocante e mortonan di e turtuga, India su National Green Tribunal, e pais su corte di mas halto pa problemanan ambiental, a menasa un prohibicion completo riba pesca durante e temporada di nest si no cumpli cu regulacionnan di pesca inmediatamente.
