Aruba tin e ‘safety score’ di mas halto den e region Caribense; Ministerio di Husticia a inverti alrededor di 10 miyon florin extra den seguridad di nos pais

The Telegraph a publica diamars 21 di januari un analisis di e problema di crimen violento den Caribe y su impacto potencial riba turismo. Den e articulo a menciona cu Aruba tin e ‘safety score’ di mas halto den region.

A indica cu algun isla den Caribe ta sufri di un aumento significante den crimen violento, incluyendo homicidio, asalto, y hortamento. Trinidad y Tobago recientemente a declara un estado di emergencia den un intento pa combati e ola di violencia, un paso cu ta refleha e gravedad di e situacion na e pais. E crecemento di crimen ta hisa e preocupacion no solamente riba seguridad local, sino tambe riba su potencial pa descurasha turismo, un sector vital pa economia di hopi isla den e region.

Sinembargo, e articulo ta enfatisa cu no tur isla den Caribe ta enfrenta e mes nivel di crimen. Aruba, un destinacion popular y reconoci pa su seguridad, ta sobresali como un di e luganan mas sigur den e region, huntu cu Bermuda y British Virgin Islands. Barbados tambe ta clasifica como un destinacion cu un bon reputacion pa seguridad. Mientras cu algun luga den Caribe ta enfrenta reto serio cu crimen, tin destinacionnan, manera Aruba, cu ta sigui mantene un ambiente sigur y atractivo pa turistanan.

Pa turistanan cu ta pensa pa bishita e islanan den Caribe, e articulo ta recomenda pa investiga e situacion di seguridad di un destinacion prome cu dicidi pa biaha pa un destinacion den Caribe.

Gabinete Wever-Croes a pone prioridad halto pa haci di Aruba un luga sigur pa localnan pero tambe pa brinda nos bishitantenan e seguridad pa nan pasa nan vakantie sin preocupacion riba nos baranca stima. Gobierno, bou maneho di Minister di Husticia Rocco Tjon, a aumenta e presupuesto di Husticia cu un suma significante, alrededor di 10 miyon florin extra, pa logra e seguridad aki cu a pone cu nos tin e “safety score” di mas halto den e region Caribense.

Prome Minister Evelyn Wever-Croes: “Mi ta gradici Minister Rocco Tjon pa su dedicacion y esfuerso pa trece y mantene seguridad den nos pais. Su maneho efectivo y compromiso durante su ministerio a contribui cu awe Aruba un biaha mas ta sobresali cu e “safety score” mas halto den e region Caribense”.