Recientemente riba rednan social a circula algun publicacion cu a hala atencion. Ta trata di turistanan cu a indica cu durante nan estadia na Aruba, nan a haya algun tipo di problema, entre otro cu a horta informacion di nan credit card of cu a horta nan pertenencia na lama.

E publicacion mas recien tabata di ayera tardi, na momento cu un turista a indica cu durante su cena na un restaurant local, el a duna su credit card na su waiter y su number di credit card a ser horta.

“PSA na cualkier persona cu ta bay come dinner na Aruba pa no laga bo credit card for di bo bista. Nos prome anochi eynan nos a duna nos credit card na nos waiter y nos number a ser horta. Nos ta 100% sigur cu el a sucede na e restaurant aki pasobra nos no a us’e niun otro caminda riba e isla y e carchi no tabata for di nos poder pa lunas,” e turista a indica.

El a sigui splica den su publicacion cu el a bay back y a notifica e restaurant di loke a sucede. E turista a indica cu el a duna e restaurant tur e informacion pertinente y e restaurant a bisa cu nan lo tuma contacto back cu nan, pero esaki no tabata e caso.

“Mi mester kere cu esaki ta mas prevalente cu hende ta kere, ta djis cu e no por ser raporta ya cu si el a sucede despues di varios dia eynan, nos no lo tabata sa unda el a sucede. E restaurant a actua hopi sorprendi y mi no ta sigur cu nan tabatin intencion di sigui investiga loke a molestia mi. Nos a bay back solamente pa nan beneficio pasobra tabata claramente un hende di nan personal cu a horta e number di e credit card,” e turista a splica.

El a sigui indica den su publicacion cu el a pensa di adverti otro turistanan tocante nan experiencia, ya cu esaki talbes no ta un incidente isola y lo por a sucede cu otro hende tambe. “Si e pasa cu bo y bo por señala unda e la pasa, ta miho pa laga e establecimento sa,” el a resalta.

Den su publicacion e turista aki no a menciona e nomber di e restaurant unda nan e horta e number di su credit card. Esaki den comentarionan a hala atencion, y hopi otro persona tabata puntra pa e nomber di e restaurant pa evita cu nan lo por pasa den algo parecido.

E turista a actualisa su publicacion despues di mira e comentarionan, y a splica cu el a tuma e decision pa no nombra e restaurant pasobra e no tabata kier ser acusa di a pone nan como obhetivo y di haci daño na nan negoshi.

“Nunca mi no a spera di haya critica pa no a nombra nan! Mi a publica pa hende tabata na altura cu esaki por a sucede y kico pa haci en bes di esey, pasobra mi no tabata na altura cu nos por a usa tap pa paga, ya cu e no a ser ofreci na nos. E por a sucede na cualkier restaurant. Y si, nos carchi a ser usa fraudulentamente dentro di algun ora, cu ta con nos a haya sa cu el a ser horta,” e turista a enfatisa.

Den e comentarionan, algun otro turista a señala cu nan a pasa den e mesun situacion. Un turista a indica cu e dia cu nan a yega, e informacion di credit card di su prima tambe a ser horta inmediatamente.

Otro a menciona cu esaki no ta prome biaha cu el a yega di lesa un publicacion den e mesun grupo tocante e mesun situacion.

Di otro banda, tabatin otro turista cu a publica su experiencia desagradabel cu el a pasa mientras e tabata na lama.

“Biaheronan tene cuidao! Mi a ser horta awe na Eagle Beach. Tabata sumamente druk pa motibo di e cruceronan y mi ta kere cu ladronnan a probecha di e circunstancianan aki. Tene bo pertenencianan cerca bo y no bay lama lagando bo obhetonan sin supervision. Aruba no ta manera antes mas,” el a indica.

Otro turista a publica tocante su experiencia similar. Den e caso aki e turista tabata na lama den oranan di anochi y a mira con e ladron a core bay cu su pertenencianan.

“Publicando esaki como un palabra di precaucion y tambe como un yamada pa ayudo si hende por tene nan wowo habri eyfo. Mi ruman muhe y ami tabata riba e beach pafo di e Marriott Ocean Club ayera nochi pa alrededor di 10:30 pa 11or di anochi, un homber a cana pasa cu un flash light. Nos a pensa cu e tabata djis usando e luz pa wak unda e tabata bay, ya cu tabata scur y no a pensa mucho riba dje. Mas o menos 5-10 minuut despues, un homber a core bay banda di e palapa banda di nos caminda mi tas tabata y a rank’e for di mesa, prome cu sigui core. Mi ruman muhe y ami a core su tras, gritando pa yudansa a traves di dos playa for di e Ocean Club te na e Stellaris (Marriott Bonvoy),” e turista a skirbi.

El a sigui indica den su publicacion cu e tin 20 aña caba ta bishita Aruba cu su famia y nunca el pasa den un experiencia manera esaki. “Mi ruman muhe y ami ta sinti nos mes asina viola y sacudi di e incidente, sabiendo cu e tabata plania y cu nos a ser mira como obhetivo,” e turista a expresa.

Ambos publicacion a ricibi hopi comentario y reaccion, den su mayoria di parti di turistanan cu ta indica cu aunke Aruba ta un di nan islanan faborito pa disfruta di nan vakantie, e isla no ta loke e tabata antes.

“Mas druk Aruba a bira durante e ultimo añanan y e problema constante di droga, semper lo tin esnan eyfo pa horta bo pertenencianan. Nos ta trece masha tiki placa cu nos. Solamente loke nos ta kere cu nos por tin mester. Nada mas. Nunca, nunca nos no ta laga nos pertenencianan sin supervision. Ta un lastima cu Aruba a alcansa e resto di mundo, pero e berdad ta e berdad,” un usuario a comenta.

“E ultimo par di biaha nos a sinti nos mes un tiki indiferente canando rond anochi. E no tabata mescos cu e tabata e ultimo 10 aña. Nos a dicidi di purba otro luganan y no bay back. Mi ta di acuerdo cu mayoria di e isla a cambia. E localnan ta asombroso — mi ta sinti duele di nan pasobra nan ta purba asina duro pa ta amoroso y amabel,” otro usuario a indica.