Ministerio Publico a exigi diabierna ultimo den caso contra e sospechoso J.E.P.T. un castigo di prison incondicional di cuatro aña. Ademas fiscal a exigi pa huez kita e derecho di P.T. pa stuur auto pa un periodo di cinco aña largo.
P.T. ta wordo acusa di a causa un accidente grave di trafico riba 24 di mei 2024 na Calbas y cu tabata pa su culpa cu un motociclista a bin na fayece.
Suceso
Dia 24 di mei ultimo, pa 1:30 central di polis a ser notifica di un accidente entre un auto y un brommer riba e caminda di Calabas. Central a despacha patruya na e sitio di e sucedido.
Na yegada di patruya ta bin topa cu e chauffeur di e brommer MFA-2491 ariba caminda gravemente herida. A pidi ambulance na e sitio cu urgencia. Na yegada di ambulance e personal a haci nan maximo esfuerso pa yuda e victima. Lamentablemente no por a haci nada mas p’e. Pa 2:10 di atardi dr. Texier ta constata morto di Jefferson Manuel R. Lopes naci 05-11-1995 na Aruba. E chauffeur di Toyota BYD color blanco numera A-59462 a ser transporta pa hospital pa haya asistencia medico y a keda deteni pa maneha bao di influencia. Specialista di trafico a presenta na e sitio como tambe polis tecnico pa haci nan investigacion.
E victima a bira e di seis morto den trafico.
Caso
Segun Ministerio Publico no tin niun duda cu loke a causa e accidente di trafico tabata cu P.T. no a duna voorrang y a bay core riba otro banda di caminda, door di cual el a boks frontalmente riba motorcycle di e victima. Ministerio Publico ta considera comproba cu e sospechoso a participa den trafico na un manera hopi imprudente, ademas cu e tabata bao influencia di alcohol y tabata core sin rijbewijs.
Apenas un aña prome Ministerio Publico a kita e rijbewijs aki for di dje, despues cu el a haya un castigo pa core bao influencia di alcohol. Na 2022 el a causa, riba e mes caminda aki, un otro dalmento frontal mientras cu e tabata stuur bao influencia.
Riba 7 di februari venidero Corte lo dicta sentencia den e caso.
