Recientemente por a tuma nota di un debate cu a tuma luga na Hulanda, unda algun parlamentario a trece dilanti varios preocupacion tocante e panorama di gobernacion den e islanan Caribense di Reino Hulandes.
Aunke den e sesion aki a papia tocante Corsou en particular, algo cu a hala atencion ta e mencion di e islanan den Caribe en general y mencion di ‘cronyism’, cual ta traduci na vriendjespolitiek den Hulandes.
E palabra aki ta nifica of representa e faboritismo di asociado, amigo cercano, aliado of familiarnan pa medio di otorga na nan posicionnan di poder, trabao of cu cierto bentaha sin tuma na cuenta nan cualificacion y/of habilidadnan. Esaki por sucede tanto den contexto di corporacion of di un organisacion, sinembargo tambe e ta ser mira den politica, unda decisionnan ta ser tuma a base di relacionnan personal na luga di a base di merito of con husto e decision por ta. Cronyism, of vriendjespolitiek, ta baha e nivel di transparencia y por causa un ineficiencia den un aparato gubernamental, sin tene na cuenta e corupcion y falta di confiansa publico cu ta sucede a causa di esaki.
Cronyism no ta un malesa su so cu ta mira den gobierno. Manera a menciona den un Editorial di Bon Dia Aruba un tempo pasa, titula ‘Esun ta mas ‘Friends’…, E otro ta mas ‘Family’, un di e malesanan cu ta manifesta den politica ta nepotismo, cual hopi biaha ta compaña cronyism. Esaki no ta algo cu nos a mira den un solo gobierno, esaki ta algo cu nos a mira den varios gobierno pero cu algun diferencia. Algun di nan tabata mas “pro-amigo” mientras cu otronan ta mas “pro-famia.” Sinembargo, na final di dia, no tin un diferencia grandi, den ambos caso ta mira cronyism y/of nepotismo.
E practica aki den gobierno tin un impacto significante riba pueblo, pa motibo cu aunke posiblemente for di punto di bista di algun, ta scoge persona di confiansa pa cierto posicion, esaki ta trece e riesgo cu personanan mas cualifica y adecua pa un posicion no ta ricibi esaki, lagando e pueblo cu gobierno ta sirbi, sin e oportunidadnan mereci.
Un ehempel di cronyism den gobierno menciona un tempo atras ta e posible conflicto di interes cu a mira den e proyecto di Eagle LNG.
Na fin di 2021, a firma un acuerdo entre Eagle LNG y WEB NV pa almacenahe di LNG na Aruba y suministro di gas na WEB NV. Sinembargo, e eventonan cu a conduci na e firma di e acuerdo aki a genera pregunta tocante posible nepotismo y conflicto di interes, cual lo ta un violacion serio di integridad – un palabra cu ta hopi den boca di e actual gabinete Wever-Croes II. E sospecha di nepotismo y conflicto di interes ta basa riba varios hecho, manera Fundacion Gobernacion di Calidad (SDBA pa su sigla na Hulandes) a indica den un carta dirigi na prome minister Evelyn Wever-Croes.
E Gabinete den e tempo aki a expresa for di comienso un preferencia pa e propuesta di Eagle LNG pa establece un terminal di gas na Aruba pa suminstro di gas pa e refineria y WEB NV. Sinembargo e reapertura di e refineria tabata den duda serio tanto su estado como e tendencia mundial tin tempo andando caba den reduccion di combustible fossiel. Aparentemente e maneho di WEB no tabata di acuerdo cu e escogencia di gobierno y como resultado di esaki probablemente a nenga mara WEB na un compromiso caro y largo y gobierno su solucion pa esaki tabata un “golden handshake” na ambos CEO y CFO di e compania en cuestion.
“Den nos opinion no tabatin motibo pa retira y nos lo a resisti contra esey. Pero tabatin un acercamento y negociacion net prome cu e reunion. Tabatin un oferta cu mi cliente no por a rechasa, y a haci un areglo, unda e partidonan a yega na un acuerdo pa retiro.” Abogado David Kock no por a splica kico a conduci na e situacion aki. E no tabata involucra te cu e conflicto cu a conduci na e “golden handshake.” Pero si el a bisa cu e acuerdo ta inclui un obligacion di secresia como parti di e pakete – pues no por bisa nada di e disputa ni kico a conduci na e perdida di confiansa.
WEB tambe a nenga di duna comentario, bisando cu “ningun di e partidonan por papia negativo di e otro of duna comentario.” E retiro di e dos director claramente a habri caminda pa un persona di confiansa di gobierno, Sr. Wever, kende ta sua di prome minister.
Esaki ta loke a completa e circulo den cual e posicionnan clave den gobierno, compania y representacion estatal a ser tuma pa miembronan di famia cercano; e Prome Minister tabata representa e pais como accionista mas grandi di tanto RdA como WEB, e Minister di Energia (RdA y WEB) tabata sobrino di e prome minister, e ruman tabata presidente di RdA, unda mester a construi e terminal di e proyecto, e cliente principal tabata WEB bao direccion di e sua y e bufete legal tabata e tata di e prome minister.
Den un ehempel mas recien, a mira cu Griffie der Staten a haya 4 empleado nobo cu a drenta den funcion y esaki a causa controversia ,pa motibo cu un di e empleadonan nobo anuncia tabata e ruman di parlamentario y lider di e fraccion Raiz den parlamento Misha Raymond.
Tambe den e tempo aki, fraccion di Raiz a contrata un fractie medewerker ken tambe tabata relaciona, pues tabata trata di ruman homber di e parlamentario.
Esaki ta un topico cu mester keda tene un bista riba dje y atende tambe. Su efectonan ta sumamente significante y ta afecta, manera menciona, e transparencia y confiansa publico den gobierno. Cu mas urgencia awo cu e gabinete actual na Hulanda ta teniendo un bista hopi mas critico riba e paisnan den Caribe Hulandes, y e preocupacionnan ta surgiendo cu tal urgencia cu nan ta birando topico riba agenda di debate.
E punto ta keda manera nos a menciona den e Editorial antes menciona; Nos por keda introduci cuanto ley nos mes ta desea, o ta haya nos obliga bao presion Hulandes; tanten no tin un cambio di mentalidad profundo, nos ta keda cu e realidad di awe y semper, esun mas pa amigo, e otro mas pa famia.
