Falta di informacion tocante proceso di formacion di gobierno creando incertidumbre den comunidad

Formacion di gobierno keto bay ta den su proceso, tumando su tempo, cu segun algun persona ta señala ta tumando mas tempo di loke a anticipa, specialmente teniendo na cuenta cu pa 18 di februari e partidonan y formadornan mester informa Gobernador su Excelencia Alfonso Boekhoudt por escrito tocante nan conclusionnan. 

Algun ciudadano subraya cu e tempo aki ta un poco largo, algun otro a indica cu esaki ta normal considerando cu ta trata di formacion di un gobierno cu ta lo goberna un pais, pues no ta algo di haci cune.

Algun otro ciudadano a trece dilanti cu e falta di informacion, e silencio pa loke ta e negociacionnan, cone proceso ta canando, ta un poco alarmante y por ta un indicacion cu e dos partidonan no ta yegando na otro.

Segun rumor cu ta circula, un impasse cu e partidonan ta enfrentando ta relaciona cu e hecho cu lider di partido FUTURO, Gerlien Croes, kier reduci e cantidad di ministerio na siete ministerio, mientras cu partido AVP kier mantene e mesun cantidad, esta nuebe ministerio.

Mas detaye di e proceso di formacion no ta conoci y comunidad di Aruba tin expectativa halto pa loke ta e formacion di e gobierno nobo aki. E falta di informacion ta crea incertidumbre pa loke ta e futuro di e formacion di gobierno.

Tur gabinete ta pretende di ta e inicio di algo unico, algo nobo nunca bisto. Y tin cierto señal cu por indica cu di berdad algo ta cambiando, of no. Esaki por ta riparabel na e eventual ripiticion di erornan di pasado, of un claro rechaso di continua cu esakinan.

E pregunta principal ta, kico ta haci cu e composicion final di e ministerionan? Ta conoci cu desde hopi aña caba den formacion di gobierno no ta tene cuenta mas cu cierto logica den e composicion di e ministerionan, aunke esey inicialmente, na 1986, tabata e pensamento formando e ministerionan segun cierto criterio relaciona cu e tareanan specifico cu nan tin, cu ta toca otro riba cierto tereno y por lo tanto tin cierto relevancia poniendo nan hunto.

Sin embargo, sigur den e caso di formacion di gobierno di coalicion, oportunismo politico a vence y a bira algo normal cu den formacion ‘tur opcion ta riba mesa’. E negociacion den e estilo aki en berdad ta contribui na e ‘flexibilidad’ na mesa pa por yega na un gabinete, pero mas cu un biaha ta surgi combinacion di cartera cu ta desafia logica completamente.