Altocomisario di Cuerpo Policial di Aruba, Ramon Arnhem, a indica recientemente cu e no ta sigur cuanto tempo mas e lo keda na Aruba desempeñando e trabou cu el a bin ta haci desde augustus 2022 pa motibo di cambio politico na Aruba.
Asina e Altocomisiario a duna di conoce na e medio Aruba.nu durante un entrevista realisa cu e medio. Arnhem a combersa tocante su experiencia y vision riba liderazgo mientras cu na mesun momento el a remarca cu e no ta sigur cuanto tempo mas e lo keda na Aruba den su funcion actual debi na e cambio den e clima politico.
E hefe di Polis a indica cu e ta considera su tempo na Aruba un gran honor y a enfatisa cu su meta no tabata pa siña e publico kico liderazgo ta encera, pero pa inspira otronan pa pensa riba nan propio liderazgo. El a comparti experiencianan personal y a papia di e retonan y logronan cu el a experencia desde cu el a bin Aruba.
Arnhem a papia tambe riba e diferencianan cultural entre Hulanda y Aruba. El a remarca cu e comunicacion na Aruba hopi biaha ta mas emocional y directo. El a curasha su publico pa durf di pidi yudansa y mustra emocion den rolnan di liderazgo, hasta den un cultura caminda esaki ta menos comun. “Bon liderazgo ta autentico. Bo mester ta bo mes y respeta otronan pa ken nan ta,” Arnhem a bisa na e portal.
E hefe di polis a indica tambe cu e tin hopi aprecio pa cultura Arubiano y ta haciendo su best pa siña Papiamento pa por conecta miho cu otronan. Aunke e ta comete eror, e ta mira esaki como un paso importante pa bira mas cerca di e comunidad.
Esaki ta un aspecto cu a resalta entre comunidad mes. Hopi a tuma di nota di e esfuerso di e hefe di Polis pa siña Papiamento y purba papia den e idioma, locual hopi a aplaudi.
Arnhem a enfatisa cu e ta considera su posicion como hefe temporal di polis un honor y responsabilidad, pero cu su servicio continuo finalmente no ta den su man. “Na dado momento mi posicion lo termina. Tin un tempo pa bay y entrega mi tarea,” el a bisa.
Apesar di e incertidumbre, Arnhem ta mira atras cu orguyo y gratitud riba su tempo na KPA y e acogida caluroso cu el a experencia di e comunidad di Aruba. Su mensahe ta keda cu liderazgo no ta tocante poder, pero tocante conecta y inspira otronan.
Arnhem a traha pa mas cu dies aña den Korps Politie Nederland. E tabatin un funcion importante di hefe pa e districto di Ijsseland na Hulanda. Bou di su funcion e tabata dirigi y lidera un districto grandi cu mas o menos 800 polis trahando den diferente warda pa mantene e seguridad di un comunidad cu basta habitante.
Na aña 2022 el a dicidi di tuma un reto nobo den su carera pa por guia un Cuerpo hoben y dedica. Hunto cu su famia el a bin biba na Aruba y dia 15 di augustus 2022 el a huramenta como Altocomisiario di Cuerpo Policial di Aruba. Desde e fecha aki el a tuma e responsabilidad pa guia y lidera e Cuerpo Policial di Aruba pa asina por yuda eleva e cuerpo, pero tambe trece su vision y mision pa e organisacion.
