Eleccionnan di Reina di Carnaval ta tras di lomba, y esaki ta trece cune comentario positivo y negativo di comunidad. E aña aki, un aspecto cu a destaca ta cu no tabatin hopi candidata participando den e diferente categoria, locual ta un di e puntonan principal di un debate riba rednan social pa loke ta trata e premiacionnan pa e reinanan cu a competi den fin di siman, specificamente den e categoria di Reina Grandi y Señora Carnaval.

Diasabra anochi, Aruba a conoce su Reina Infantil y Reina Hubenil pa Carnaval 71. Reina Infantil a keda den persona di Camila-Victoria Feliciana, y Reina Hubenil a bira Evah Ras. Diadomingo anochi a toca turno na e categoria di Reina Grandi, cu a keda den persona Kaylie Figaroa, y categoria di Señora Carnaval, cu a keda den persona di Djanira Kock.

Den categoria di Reina Infantil tabatin tres candidata so a participa. Den e caso aki Stichting Maneho di Aruba su Carnaval (SMAC) si a opta pa duna tur candidata un sjerp y hasta un corona, un gesto bunita, specialmente considerando cu ta trata di mucha y pues no por laga un mucha keda sin haya un premio.

Pasando pa categoria Reina Hubenil tabatin cuater candidata, di cual dos di e candidatanan a bay cu tur e premionan, lagando dos candidata sin haya niun titulo. Ya aki comunidad a cuminsa expresa nan malcontento y a cuestiona dicon SMAC a saca solamente primera finalista y reina, y no a saca di tres y di dos finalista pa duna e otro dos candidata un premiacion y no laga nan man bashi.

E “bomboshi” mes, manera Arubianonan gusta referi na dje, a explota diadomingo anochi durante eleccion di Reina Grandi y Señora Carnaval. Den ambos categoria tabatin tres candidata so cu a participa. Manera den tur competencia, ta un ganador maximo so por tin, pero un hecho cu a disgusta comunidad hopi ta cu aunke tabatin tres candidata so, SMAC a opta pa no saca un segunda finalista.

Den ambos categoria tur candidata a duna nan maximo esfuerso y publico a gosa y disfruta di tremendo shownan di carnaval. Mas cu claro, manera den mayoria competencia di reina, un ta resalta mas cu e otro, pero den ambos categoria un candidata so a bay cu tur premio, un otro candidata a bay cu e titulo di primera finalista, lagando un candidata e ora sin ningun premio.

Esaki ta loke tin e comunidad di Aruba disgusta.

Riba rednan social hopi ciudadano a señala e hecho y a cuestiona con por ta posibel cu mirando cu tin tres candidata so ta competi den ambos categoria SMAC no a duna un sjerp pa segundo finalista sigurando asina cu tur candidata ta haya un premio.

Den categoria di Reina Grandi e candidata representando Dushi Carnival Group y Colegio EPB, Tiana Tromp, lastimamente tabata e candidata cu a keda sin premio y den e categoria di Señora Carnaval, Maria Brete, cariñosamente yama Mama Sila, representando Bomboshi Comedy Group, a keda sin ricibi un premio.

Mama Sila tin 71 aña di edad y a subi riba escenario pa haci un soño di dje bira realidad. Cu su carisma y alegria el a captura e curason di pueblo di Aruba y a ser nombra cariñosamente “Mama di Carnaval”. E hecho cu el a keda sin haya niun premio, ni un sjerp di segunda finalista, a haci cu hopi a critica y cuestiona den ki direccion carnaval di Aruba ta bayendo.

Den pasado e eleccion di Señora Carnaval tabata un eleccion dirigi mas riba e parti di señora, y e shownan tabata mas den estilo di comedia. Poco poco e edad a baha y e concepto di e shownan a cambia y a cuminsa tuma parecido na e shownan di Reina Grandi.

Cu e resultado di e weekend aki hopi a trece dilanti e mesun idea, pa cambia e rekisitonan pa por competi pa Reina Grandi y Señora Carnaval. E cambionan sugeri ta pa aumenta e edad maximo pa un candidata por participa den e categoria di Reina Grandi y aumenta e edad minimo pa un candidata por participa den e categoria di Señora Carnaval. Ya no tin e diferencia asina grandi di edad entre e candidatanan pa Señora Carnaval, cual en realidad ta un di e motibonan pakico e resultado ta manera cu e ta.

Ciudadanonan riba rednan social a señala cu e no tabata costa SMAC nada pa traha un sjerp di segunda finalista pa e candidatanan den ambos categoria no keda sin haya nada, mas ainda teniendo na cuenta e cambionan cu e organisacion a haci pa “genera mas entrada” pa cubri gastonan di carnaval. Sjerp y premio ta cay bou di gastonan di carnaval, toch?

Algun otro usuario a indica cu otro posibilidad ta cu por agrega un otro categoria memey di e categorianan Reina Grandi y Señora Carnaval pa e señoranan un poco mas hoben lagando asina e categoria di Señora Carnaval pa señoranan di edad mas avansa y hibando e concepto di Señora Carnaval na su concepto original.

E criticanan contra SMAC ta fuerte y hopi ta disgusta pa con e organisacion ta tumando cierto decisionnan. Esaki no ta solamente relaciona cu eleccion di Reina, pero tambe cu diferente otro actividad di carnaval organisa pa SMAC cual ta demostra cu poco poco menos hende ta participa pa motibo di malcontento cu e organisacion.

Comunidad ta expresa cu e maneho cu SMAC ta hibando y decisionnan cu e organisacion ta tuma ta laga hopi di desea y lastimamente hopi ta sinti cu e tipo di maneho aki poco poco lo caba cu Aruba su carnaval.