Seminario riba proyecto innovativo cu ta expande cria y plantacion riba awa Concepto di Floating Farm por yuda contribui na seguridad di cuminda na Aruba

Cria cabrito y galiña riba lama, procesa nan produccion ademas cu ta produci berdura y aromatico den forma hidroponico. Esey ta e vision di Director di Departamento di Agricultura, Cria y Pesca (Santa Rosa) y Presidente di Dutch Caribbean Agriculture, Livestoch and Fisheries Alliance, DCALFA, Nathalie Maduro. Durante un seminario na , Maduro hunto cu e team di Santa Rosa a presenta e concepto di Floating Farm, un proyecto di agricultura inovativo di Peter y Minke van Wingerden, kendenan ta e visionarionan tras di e prome ‘floating farm’ na mundo.

“Ya nos a pasa di e narativo cu produccion di cuminda ta impractico, pa motibo cu e ta rekeri hopi labor, ta competi cu turismo y ta contribui masha poco na nos producto bruto nacional. Mundo a cambia, y nos tambe,” ta locual economista Rendell de Kort a bisa na inicio di e seminario. De Kort, kende a haci un introduccion riba e tema di seguridad di cuminda a trece e puntonan cu ta importante pa Aruba, esta e demanda di turismo, e tendencia pa consumi productonan mas saludabel, y resiliencia economico cu por yuda e comunidad supera periodonan dificil, manera tempo di e pandemia. “Con agil nos ta pa adapta na e cambionan aki? Nos tin e curashi pa experimenta y innova.” De Kort a ilustra cu ya caba tin e prome pasonan. E concepto di hidroponico ya ta estableci na Aruba y companianan manera Qredits ta yuda diversifica empresaria den agricultura na Aruba.

E concepto di agricultura y cria riba awa tin hopi potencial pa Aruba, segun Nathalie Maduro. “E ta alinea cu nos metanan comparti riba sostenibilidad, resiliencia y innovacion. Un proyecto di plantamento y cria cu ta flota por ta un modelo pa produccion di cuminda y tambe un simbolo con creatividad y tecnologia nobo por transforma retonan den oportunidad,” Maduro a bisa.

Y Aruba tin hopi reto. Manera cualkier isla chikito den desaroyo, Aruba ta confronta falta di espacio, dependencia riba importacion y impacto di cambio di clima. “Ta retonan cu ta rekeri solucion audaz.”

Kico ta ‘Floating Farm.’

Peter van Wingerden, arquitecto, a haya e idea pa haci uso di balsa pa agricultura, despues cu el a haya e encargo pa diseña casnan flotante riba e riu Hudson na New York. E mesun periodo ey, na 2012, Horcan Sandy a impacta e ciudad di tal forma cu no tabatin ningun cuminda den supermercado. Un ciudad moderno manera New York a keda sin cuminda pa su miyones di habitante. Y asina e pensamento di sostenibilidad y seguridad di cuminda a bira un enfoke di e ingeniero. A logra presenta un plan na municipio di Rotterdam y cu un inversion di tres miyon euro a realisa e proyecto cu ta inclui un balsa di tres nivel unda te hasta ta cria baca. Intencion di e proyecto ta pa e bira 100 porciento dependiente di produccion di coriente propio, pero en todo caso, segun van Wingerden, henter e proceso di produccion di entre otro lechi y keshi ta circular.

A pesar di no tin subsidio, a logra cera aliansa na Rotterdam cu sector priva y publico, unda ta colecta resto di cuminda pa prepara locual mester pa cria e bacanan, ademas cu ta reusa tur locual e animalnan mes ta produci, pa enrikece e produccion di berdura. “Nos ta hasta usa e sushi di bacanan pa traha bloki cu por usa pa construccion,” van Wingerden a splica durante e seminario. E idea mientrastanto ta hayando hopi atencion rond mundo, for di Vietnam te na Dubai. Y si tur cos bay segun vision di Maduro, kizas na Aruba y den region tambe.

Y esey tabata su meta pa a invita meta e representantenan di Floating Farm, esta pa traha un estudio di viabilidad pa Santa Rosa, di forma cu por identifica e areanan pa ubica un sistema asina, ademas di crea e espacio pa inversionistanan y particularmente agricultornan na Aruba participa den un proyecto asina.

“Colaboracion entre tur sector, cu ta esun publico, priva, actornan envolvi y tambe academia, ta elemental pa sigura exito di e iniciativa aki.”Pa tal motibo mes cu a invita tur director di departamento publico relevante ademas di ehecutivonan di APA, WEB y ELMAR, mirando cu tur tin un papel pa hunga den realisacion di proyectonan, pa e seminario aki. Tambe a extende invitacion na Ministernan demisionario Ursel Arends di medio ambiente y Geoffrey Wever di Economia. Aunke cu varios, incluso e Ministernan no a atende, e interes di instancianan manera Aruba Conservation Foundation, Directie Natuur en Millieu (DNM) y tambe Obranan Publico (DOW), pero tambe APA y ATA tabata grandi.

Despues di e presentacion, Peter y Minke van Wingerden a haya un recorido di e zona costal di Aruba, ademas di a bishita Aruba Conservation Foundation, pa asina por duna un miho evaluacion riba e posibilidadnan pa Aruba.

E estudio mes ta costa 16 mil florin cu ta sali di e presupuesto di Santa Rosa, pero pa realisacion di e proyecto, Nathalie Maduro ta kere cu e ta uno di sector priva. “Pasobra Gobierno mes no tin placa,” el a bisa.

.