(AP) – Pa prome biaha den historia Mericano, un presidente electo ta bay ricibi lidernan stranhero pa un di e tradicionnan politico mas Mericano – e transferencia pacifico di poder.
Presidente electo Donald Trump a invita presidente Chines, Xi Jinping y lidernan di mundo conservador manera presidente Argentino, Javier Milei y premier Italiano, Giorgia Meloni na e inauguracion. Xi a manda su vice-presidente como representante.
Anteriormente, ningun hefe di estado a haci un bishita oficial na Merca pa e inauguracion. Algun di nan, manera Milei y presidente Paraguayo Santiago Peña, tabata invitado special diasabra nochi pa e Baile Inaugural Hispano, unda varios nominado di Trump pa posicionnan clave den Gabinete tabata presente. Esey a inclui Senador Marco Rubio, scogi pa lidera Departamento di Estado, y Robert F. Kennedy Jr., nomina pa lidera e Departamento di Salud y Servicio Humano.
Yegando awe na Washington pa e di 60 inauguracion:
Presidente Chines Xi Jinping, kende tabata e prome lider cu su invitacion na e inauguracion a bira publico na december. Vice-presidente Han Zheng ta bin den su nomber.
Presidente Argentino, Milei tabata e prome lider stranhero pa reuni cu Trump despues di eleccion dia 5 di november, biahando for di Buenos Aires na e club Mar-a-Lago di e presidente electo.
Premier Italiano, Meloni ta otro lider cu recientemente a bishita Mar-a-Lago. Su agenda semanal ta bisa cu e ta bay atende e ceremonia di huramentacion.
Presidente pro-Occidente di Georgia, Salome Zourabichvili ta bay atende e ceremonia como invitado di Senador Mericano, Joe Wilson.
Presidente Frances, Emmanuel Macron, kende a reuni cu Trump luna pasa na Paris durante reapertura di Catedral Notre Dame, no ta bay ta presente na e inauguracion di Trump. Pero figuranan di derecha di e pais a bisa cu nan ta biahando pa e inauguracion. Eric Zemmour, un presentador di talk show kende a bira politico conservador y su partner, Sarah Knafo, miembro di Parlamento Europeo, a bisa cu nan ta bay ta presente.
Politico prominente di ultra derecha, Marion Marechal a bisa den un declaracion cu e tambe ta bayendo. E ta miembro di Parlamento Europeo.
Ademas, oficina di presidente Ecuatoriano, Daniel Noboa y presidente Paraguayo, Santiago Peña a bisa cu nan tabata invita pa e inauguracion y tabatin plan pa atende.
Taiwan a manda presidente di Congreso, Han Kuo-yu y siete otro na Washington pa e inauguracion, pero ministerio di Exterior Taiwanes a bisa cu su delegadonan no lo atende e ceremonia awo cu a mov’e paden pa motibo di clima friu.
