Ayera, riba rednan social, un grupo di bishitante di Aruba a debati si Aruba ta mesun safe cu su reputacion ta indica. Sinembargo, un categoria di crimen cu a registra aumento durante añanan, sorprendentemente, ta uno cometi pa turista mes.

Den un post riba e pagina conocido, All Things Aruba, usuario di incialnan B.W.N. a puntra pakico mayoria di negoshi tin bara di metal y heki pa cera na yabi. “Mi a tende cu e isla aki ta safe,” el a indica.

E post a genera casi 100 comentario prome cu e administrador di e grupo a deshabilita e opcion pa post comentario, cu cantidad di local y bishitante debatiendo si Aruba ta safe, y pakico tin mas medida di proteccion y seguridad manera heki y bara di metal.

Mayoria di comentario ta di acuerdo cu Aruba ta hopi safe, y ta specula cu motibo cu ta pone proteccion ta pa preveni, pa ‘common sense’ of pa aumenta balor di propiedad. R.H. a bisa: “Privacidad y balor. Casnan cu tin nan propio heki/cura ta haya un boost den balor di propiedad.” Nan a enfatisa cu Aruba ta safe relativo na otro islanan. “Pero toch tin crimen ocasionalmente,” K.d.L. a comenta.

Usuario local B.B. a comenta: “E isla ta safe den sentido cu bo no ta bay ser atraca canando riba caya. Sinembargo, hortamento ta tuma lugar den anochi y hopi negoshi tin enemigo rival/competencia, pues nan mester protege nan negoshi. Djis pasobra e ladronnan aki no ta kibra drenta bo AirBnB of hotel no kiermen nan no ta kibra drenta tienda den anochi.”

Sinembargo, tabatin algun comentario enfatisando e hecho cu den ultimo añanan, seguridad na Aruba a bay atras, cu un aumento den crimen y desconfiansa. M.H.G. a bisa: “E villa unda nos a keda a bira victima di robo algun aña atras. Polis ta bisa cu e ta pasa tur ora.”

S. V. C. a conta cu el a mira un desaroyo negativo: “No ta mesun safe cu tabata antes… keda vigilante tur dia!” K.O.B. a agrega: “Aruba ta relativamente safe, sinembargo, nan tasa di crimen a aumenta drasticamente den ultimo 10 aña. Aruba ta haci un bon trabao di tene crimen fuera di noticia. Sinti safe y ta safe ta dos cos diferente.”

Estadistica di crimen: Robo relativamente stabiel
 Basa riba e jaarverslagnan disponible riba website di Ministerio Publico di Aruba (OM), nos por observa cierto tendencia den e tasa di crimen den ultimo añanan. E jaarverslagen ta cubri e periodo di 2014 te 2023.

E tasa di crimen a fluctua durante e periodo di 9 aña aki, pero no a mustra un tendencia consistente di aumento of reduccion.

Entre e cambionan notable, por mira un aumento significante den crimen di 15 porciento di 2014 pa 2015, di 2,480 na 2,865. E aumento mas grandi den e periodo aki a sucede di 2018 pa 2019, unda a pasa di 2,225 na 3,214 crimen, un aumento di 44 porciento.

Pero di 2019 pa 2020 a registra un reduccion di 13 porciento, posiblemente influencia pa restriccionnan di Covid-19, a baha di 3,214 pa 2,783.

Di 2021 pa 222 a mira un reduccion chikito di 2 porciento (3,008 pa 2,950) y di 2022 pa 2023 otro reduccion di 8 porciento (2,950 pa 2,720.)

E aña cu e cantidad mas halto di crimen registra tabata 2019 (3,214). Esaki a sigui cu un reduccion gradual, probablemente reflehando cambio di politica of efecto relaciona cu pandemia. Y e aña cu menos crimen registra tabata 2018 (2,225), cu despues a aumenta significantemente e siguiente aña.

For di e datonan disponible, pa loke ta robo, (incluyendo diefstal onder verzwarende omstandigheden) a mira cantidadnan relativamente stabiel den añanan manera 2017 (276 caso) y 2018 (274 caso). Sinembargo, no a observa ningun cambio drastico den e categoria aki durante e añanan di 2014 te 2023.

Fluctuacion den crimen
 A diferencia di hortamento, crimen relaciona cu trafico, manera core bao influencia of sin rijbewijs, ta aparece consistentemente cu fluctuacion riba e rapportnan di OM. Por ehemplo, core sin rijbewijs tabata e categoria di crimen lider den algun aña, cu un peak di 706 caso na 2019. Den cierto aña, violacionnan relaciona cu trafico a surpasa hortamento y crimen violento den cantidad.

Otro area notable di crimen ta violacion di Ordenansa di Proteccion di Naturalesa. E categoria aki a registra un aumento notable na 2021, cu 508 caso, atribui en gran parti na turistanan purbando di exporta flora, fauna y cocolishi protegi. E aumento repentino aki ta representa un enfoke nobo riba cumplimento y conscientisacion di comunidad.