Diaranson 15 di januari ultimo, Gobernador di Aruba S.E. Alfonso Boekhoudt a ricibi Sr. John McNamara pa un audiencia di introduccion na Cas Ceremonial di Gobernador. Sr. McNamara ta e Consul-General nobo di Merca pa e region di Reino Caribense.
Segun un comunicado di prensa, durante e bishita aki Sr. McNamara a wordo acompaña pa Sr. Willem Remie di Consulado Mericano na Corsou, Sr. Wendell Roberts di US Customs Border Protection (CBP) na Aruba y tambe Sra. Jocelyne Croes, Directora di Departamento di Relacionnan Exterior.
Tambe ayera mainta, Minister di Husticia y Siguridad di Hulanda, Sr. David van Weel a bishita Su Excelencia Alfonso Boekhoudt pa un introduccion. E bishita a tuma lugar den Cas Ceremonial di Gobernador.
Minister Van Weel a wordo acompaña durante su bishita pa Sr. Gerard van Ballegooij, Director di Departamento di Asuntonan Europeo y Internacional y Sr. Vincent Storimans, Representante di Hulanda Suplente na Aruba.
Y diamars mainta, 14 di januari 2025, Gobernador di Aruba a ricibi e Ombudsmannan di Reino pa un audiencia na Cas Ceremonial di Gobernador.
Presente na e audiencia tabata Sr. Reinier van Zutphen, Ombudsman di Hulanda, Sra. Jurima Bryson, Ombudsman di Aruba, Sr. Keursly Concincion, Ombudsman Curaçao y Sra. Gwendolien Mossel, Ombudsman Sint Maarten.
E Ombudsmannan di Reino ta reuni anualmente pa consulta den un di e paisnan di Reino, e aña aki pa prome biaha den presencia di un Ombudsman di Aruba.
Potret: © Kabinet Gouverneur Aruba
