Siman pasa dia 10 di Januari 2025 a tuma luga e inauguracion di e Presidente nobo di Venezuela, señor Nicolas Maduro. Manera ta conoci, Reino Hulandes no ta reconoce e eleccion di Nicolas Maduro como presidente di Venezuela, mirando cu Union Europeo a pidi pa Nicolas Maduro demostra cu e actanan cu realmente el a gana e eleccion, y esaki nunca a keda demostra. Pa e motibo aki, Reino Hulandes a keda riba e punto cu nan no ta reconoce e victoria ni su inauguracion.

E ponencia aki di Reino Hulandes a crea cierto tension den e relacion entre Reino Hulandes y Venezuela, cu e resultado cu Nicolas Maduro a tuma e decision cu embahada di Reino Hulandes na Caracas lo mester reduci su personal di diplomaticonan Hulandes cu ta na Caracas. Actualmente tin un total di 6 persona di Hulanda na Caracas, di cual 3 lo mester bay back. Esnan cu lo keda eynan lo ta e Embahadora mes cu dos miembro mas di e personal y tur e trahadonan local. A pesar cu e cantidad di personal ta ser reduci, e trabounan consular di Embahada, y e trabou di aplicacion pa visa lo continua y lo ta conduci pa e Embahadora mes cu sosten di e personal local.

E decision di Nicolas Maduro sigur no a cay na agrado di Hulanda, y basa riba esaki, Minister di Relacion Exterior di Hulanda a duna orden pa e Embahada di Venezuela na Den Haag tambe baha su cantidad di persona cu Venezuela a manda pa eynan. Eynan tin un total di 4 empleado di cual 2 lo mester retira. Esaki sigur ta un contra reaccion di Hulanda riba e decision di Presidente Maduro, ya cu nan no a aprecia e decision tuma.

Hecho ta cu tur e contratemponan aki ta trece mas tension den e relacion entre Hulanda y Venezuela, pero di parti di Ministerio di Relacion Exterior a sigura cu e consulnan lo sigui haci nan trabou y cu e trabounan consular cu ta ser haci na e Embahada na Caracas pa cu ciudadanonan di pais Aruba lo continua. Pa loke ta e Consul di Venezuela na Aruba, trabounan tambe lo sigui debidamente.

Pa loke ta e tema di defensa, siman pasa Prome Minister a reuni cu Minister di Defensa di Reino señor Ruben Brekelmans, cu tabata na Aruba. Durante e reunion a delibera extensamente riba e tema aki, na unda cu Minister Brekelmans a sigura cu pa awor, Aruba no tin motibo pa preocupacion. E situacion ta uno tenso y ta wordo vigila hopi di cerca, pa asina Aruba ta prepara den caso di cualkier eventualidad.

Prome Minister a expresa den un comunicado di prensa cu e situacion y e violacion di derecho humano na Venezuela ta un topico hopi preocupante, y cu ta riba su agenda di prioridad ya pa 7 aña caba cu e ta den Gobierno. E situacion aki ta uno cu Venezuela mes tin cu soluciona internamente, y Aruba no por yuda cu nada na e momentonan aki, solamente uni den oracion pa pronto bin un resolucion pa cu e situacion aki na Venezuela.

Frontera cera
 Mientras tanto, december ultimo, autoridadnan di aviacion di Aruba a extende cu tres luna mas e prohibicion di vuelo comercial di pasahero, carga y aviacion general for di y pa Venezuela.

E NOTAM publica riba rednan social pa varios abogado specialisa den e sector di aviacion ta resalta cu e frontera aereo ta bay keda cera te cu dia 16 di maart 2025. Esaki segun e notificacion A0770/24 emiti pa Aeropuerto Internacional Reina Beatrix.

Na Venezuela, e noticia a hala atencion. Por ehemplo, portal talcualdigital a bisa cu “tabata spera cu e reinicio di vuelo entre Aruba y Venezuela lo bira efectivo despues di declaracionnan di prome minister di Aruba, Evelyn Wever-Croes, den cual el a afirma cu tabata ‘finalisando e tramitenan pa reapertura di e frontera. Awo nos ta bay inicia negociacion cu autoridadnan Venezolano. Ya aduana, inmigracion y aviacion civil di Venezuela y Aruba ta den contacto. Esaki ta algo cu por concreta pronto. Nunca antes nos tabata mesun cerca cu awo.’ Sinembargo,” e portal ta nota, “dia 22 di januari ultimo, e mesun prome minister Evelyn Wever-Croes a plantea e posibilidad di un apertura den prome trimester di aña, sigurando cu tabata haciendo e dialogonan necesario” pa concreta e plan aki.

Conseho di biahe negativo
 Na mesun momento, december ultimo, Directie Buitenlandse Betrekkingen Aruba a anuncia cu a emiti un conseho di biahe negativo pa Venezuela.

Despues di eleccion presidencial na Venezuela den luna di juli ultimo e situacion na e pais a empeora y a bira hopi preocupante. Gobierno di Aruba conhuntamente cu ministerio di Asuntonan Exterior di Hulanda a bin ta sigui e desaroyonan na e pais bisiña. Mirando e desaroyonan aki, cu ta particularmente alarmante, Directie Buitenlandse Betrekkingen Aruba a emiti codigo di alerta cora y oraño pa Venezuela.

A emiti codigo di alerta cora pa e partinan noordwest, noordoost y zuid di Venezuela, y codigo di alerta oraño pa Caracas, Isla Margarita, Los Roques, y den e centro y parti zuidoost di e pais.

Mediante un comunicado di prensa, ministerio di Asuntonan Exterior di Reino Hulandes a alerta tur persona di nacionalidad Hulandes y tur persona residencia legalmente na Aruba pa no biaha pa Venezuela. E ministerio a ricibi informacion tocante varios suceso cu ta envolve turista na Venezuela y entre esnan mas afecta ta turistanan cu ta bay bishita familiarnan.

Directie Buitenlandse Betrekkingen ta conseha pa biaha pa Venezuela solamente si ta berdaderamente necesario y no ta recomenda à realisa biahe di vakantie pa e pais pa motibo di seguridad.

E ministerio ta haci peticion na personanan di nacionalidad Hulandes y/of cu ta residencia legalmente na Aruba cu tin pensa di biaha pa Venezuela of ta encontra nan mes na Venezuela caba, pa registra nan mes via e servicio di informacion.

Di e forma aki Reino Hulandes por tin un bista di e cantidad di persona cu ta na Venezuela pa asina por ta na altura di cualkier evolucion y por brinda asesoria. Den caso cu dicidi di biaha toch pa Venezuela, embahada di Reino Hulandes ta enfatisa cu den caso di un incidente no por garantisa asistencia y cu ayudo consular ta hopi limita.