Recientemente, Oficina Central di Estadistica, CBS a publica datonan economico pa luna di november 2024. Entre otro, e Canasta di Consumo a registra un aumento di prijs, igual cu e Core Inflation tambe a registra aumento.

Canasta di consumo

E canasta di consumo di e CPI ta consisti di 408 bienes y servicionan. Compara cu October 2024, 43.4% di e bienes y servicionan aki a conoce un aumento di prijs causando un efecto di 1.00 ppt, mientras cu 41.2% ta mustra un caida di prijs, cu a contribui cu un efecto di -0.94 ppt y pa e restante 15.4% no tabatin cambio den prijs.

Prijsnan di bienes a baha cu 0.4% y a causa un efecto di -0.23 ppt, mientras cu prijsnan di servicionan a conoce un subida di 0.7% y a causa un efecto di 0.28 ppt riba e CPI di November 2024

Core inflation

E CPIC (core inflation) – CPI excluyendo e efecto di energia y cuminda – a registra na November 2024 un subida di 3.0%. E indice di energia – cu ta consisti di e productonan: electricidad, awa, gasolin y diesel – a registra un caida di 2.9%. E indice di cuminda a registra un subida di 2.2%.

Kico ta CPIC?

E CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total. E indice di e inflacion basico ta sirbi pa evalua e tendencia riba medio y largo plazo di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia.

E CPIC ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual).

Elaboracion di un CPI tin tres meta principal.

1.Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering.

2.Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo.)

3.Como un medio pa gobiernonan y/of banconan central fiha obhetivonan inflacionario.

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-15 aña) na November 2024 ta Afl. 5,512, un caida di Afl. 8 compara cu October 2024 (Afl. 5,520). E bestaansminimum pa un hogar di un (1) adulto ta Afl. 2,625, un caida di Afl. 4 compara cu October 2024 (Afl. 2,629). Kico ta un “Bestaansminimum” y con e ta wordo ahusta? CBS ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta wordo referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni).

Un indice a wordo crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e prijsnan di alimento, paña, vivienda, transporte y otro articulonan den e canasta. E bestaansminimum actual ta wordo basa riba e rapport “Bestaansminimum 2010” publica door di CBS na November 2010, y cual ta wordo actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).

Cambio di prijs di Cuminda y servicio di catering na November 2024

E indice di “Cuminda & servicio di catering” a registra un subida di 0.3% na November 2024, despues di a registra un subida di 0.1% na October 2024.

E indice di “Cuminda na cas” (0.2%) a registra un subida, unda shete (7) di e diesun (11) indicenan di e gruponan di cuminda na cas a subi na November 2024. E indice di “Berdura” a conoce e subida di mas grandi (2.1%) na November 2024.

Otro subidanan significante a wordo registra den e indicenan di “Azeta y otro productonan traha di vet” (1.3%), “Pisca y otro cuminda di lama” (1.2%) y “Lechi, keshi y webo” (0.8%).

E caida mas grandi a wordo registra den e indice di “Batata, yuca y batata dushi” (-2.6%) na November 2024. E indice di “Cuminda pafo di cas” a registra un subida di 0.4% na November 2024. Na November 2024, “Cuminda na cas” y “Cuminda pafo di cas” como grupo, tabatin un subida di prijs di 0.3% compara cu October 2024 y hunto tabatin un influencia di 0.05 ppt riba e CPI, mientras cu e restante bienes y servicio hunto a experencia un subida leve di prijs di 0.01% y tabatin un efecto di 0.01 ppt riba e CPI.