Invadi bisiña ta… Birando algo normal…?

Nos bisiña mas recalcitrante ta haya cobertura internacional cu su menaza di invadi Puerto Rico. Esaki ta djis un simple demostracion di poder, o tin mas tras di esaki? Bon mira, dictador Maduro ta den un grupo selecto di mandatario autocratico, cu ta haya cu usurpa teritorio di nan bisiña no ta problema. Recientemente e grupo ey a haya, ‘of all people’, presidente electo Mericano join nan. Kico ta e ‘next step’ anto, China anunciando pa di tantisimo biaha cu nan kier haya Taiwan back? Y kico tur esaki ta significa pa nos region? Tempo pa un analisis.

Pa cuminza, di unda realmente e menaza di Maduro ta bin? E situacion regional no ta defini solamente pa nos bisiña Venezuela, sino pa algun otro regimen den e mesun categoria, Cuba y Nicaragua, cu ta aliado fiel di e paisnan cu mas ta den confrontacion cu Union Europeo y Estadonan Uni: Rusia, China, Iran, Corea di Norte. Den e confrontacion di e paisnan di regimen autocratico cu nan adversarionan, Venezuela ta e punto mas fuerte di destabilizacion riba henter e continente, cu por actua na nan fabor si ta necesario. Na e momento aki, cu Rusia den un situacion bastante dificil den e guera cu nan mes a cuminza na Ucrania, no ta un sorpresa cu e ‘amigonan’ di Putin riba nos continente ta inicia accion cu por fortifica posicion di Rusia, cu despues di e sucesonan sumamente negativo pa nan na Siria, por usa tur apoyo cu por tin. Pues si e regimen di Maduro ta cuminza plama menaza den nos region, nos no mester ta sorprendi.

Pero tin algo mas; recientemente na Rusia mes gobierno a keda sorprendi pa e apoyo cu nan ta hayando di presidente electo di Merca, cu desde otro siman lo tin timon di e pais mas poderoso den su man, y ta haciendo un tremendo esfuerzo ‘normalizando’ e pensamento cu ley y derecho internacional no ta relevante y cu usurpa teritorio di pais bisiña ta algo cu bo por djis haci: “esun cu por, por,” manera nos propio expresion lo bisa…

Pakico esey ta relevante? Pasobra mientras hopi ta specula con rapido e presidente Mericano nobo lo pone un fin na e guera na Ucrania, e ‘pacificador’ ta hustamente esun cu ta bisa cu e no tin problema pa usa forza militar pa ocupa Groenlandia o canal di Panama. Mientras cu su expresionnan a causa sorpresa y tumulto, realmente historia di Estadonan Uni ta marca y mancha pa ocupacion di otro pais via puro poder militar. E propio Panama ta prueba di esey siendo e producto di robo di teritorio Colombiano pa crea un republica nobo pa construi e canal den man sigur di poder militar Mericano. E parti sur di Merca tambe ta producto di guera di ocupacion cu a costa Mexico casi mitar di su teritorio original. Sin embargo, esey no ta kita cu e mesun Estadonan Uni ta opera como principal ‘polis internacional’ na fabor di mantene democracia parlamentario, y respet pa ley y derecho. E pregunta clave awor ta: nos lo bay mira un continuacion di defensa Mericano di e soberania di Ucrania contra e intento di usurpacion Ruso, o Trump ta yega na un ‘entendimento’ cu e otro podernan grandi, cu cada un por haci den nan ‘traspatio’ loke nan ta considera apropia. Aña 2025 por bira un aña clave cu mas conflicto arma continua o inicia, o por conduci na acuerdo na nivel presidencial entre Rusia, China y e presidente nobo na Estadonan Uni, cu consecuencia pa e situacion na Ucrania y Taiwan, entre otro.

Pa e paisnan Europeo, entre nan esun na cual nos ta pertenece, esaki lo significa cu nan mester bay dedica hopi mas atencion y recurso na e situacion na Ucrania y e riesgonan den otro teritorio cerca di Rusia. Pa Reino Hulandes ta bin acerca e riesgonan special cu ta surgi di e hecho di tin frontera cu Venezuela, loke por bira escenario di posible provocacion, den cuadro di e intentonan di Rusia pa causa sabotahe y confusion na diferente lugar, usando varios tipo di arma, manera daño na cable submarino di internet, loke nos por a mira recientemente den Lama Baltico. Por imagina anto cu nan aliadonan por participa den e tipo di intento aki. A proposito, esey ta trece nos na e tema di nos propio isla cu te awe nos gobiernonan a percura pa nos tin un solo conexion di cable internacional, loke ta haci nos sumamente vulnerable na e momento aki. Punto importante anto pa formacion di gobierno: amplia nos opcionnan permitiendo porfin un segundo cable submarino di conexion internacional. Nos ta prepara pa e tipo di accion aki?

Banda di esaki nos ta keda cu e incertidumbre di e posible fluho nobo di migrante Venezolano, fruto di e situacion aya cu no lo mehora. Esey ta pone nos dilanti algun decision dificil. Nos tin un grupo considerable di migrante Venezolano den nos teritorio. Nan estadia sin documentacion ta un problema, tambe financiero pasobra nan ta traha pa por subsisti sin contribui formalmente na nos economia y caha di gobierno. Di otro banda, sigur lo contempla e riesgo cu un amnistia di algun forma lo duna e señal na otronan cu Aruba lo ta un bon destino pa busca un mihor porvenir. Ademas cu no mester descarta e posibilidad cu e regimen lo por percura pa un fluho di ‘refugiado’ asina. Tur esaki ta ocasiona cu tin mas asunto pa discuti den formacion di gobierno, fuera di propone candidato pa e puestonan. Aruba mester contesta…