(NLtimes) – E paspoort Hulandes ta sigui como un di esnan mas poderoso na mundo, segun 2025 su Henley Passport Index.

Hulanda ta comparti di 4 luga cu Austria, Dinamarca, Irlanda, Luxembourg, Noruega y Suecia, dunando acceso liber di visa na 191 destino.

E ranking, cual a keda publica siman pasa, ta evalua e mobilidad global di e 199 paspoort basa riba data exclusivo di International Air Transport Association (IATA). E paspoort Hulandes ta mantene su rango halto, cual ta fortalece su forsa den biahe global.

Esnan cu paspoort Hulandes por biaha sin un visa na 191 destino, cual ta pone nan net patras di Singapore, Hapon y un grupo di pais cu ta inclui Alemania, Francia y Sur Korea. Singapore ta den prome luga cu acceso sin necesidad di visa na 195 destino, sigui pa Hapon cu 193 y un conhunto di 6 pais den tercer luga cu tin acceso sin necesidad di visa na 192 destino.

Dr. Christian H. Kaelin, director di Henley & Partners y inventor di e concepto di indice di paspoort, a bisa cu “e nocion di ciudadania y e loteria di derecho di nacemento tin mester di un reevaluacion mirando cu falta di igualdad global ta keda crece. Paisnan cu tin paspoort den rango halto, manera Hulanda, tin un bentaha significante pa loke ta trata mobilidad compara cu esnan den un rango abao den e indice.”

Como un miembro di Schengen Area, Hulanda ta otorga su ciudadanonan acceso liber na frontera di 27 pais Europeo. Schengen su visanan tambe ta hunga un rol crucial den facilita biahe pa esnan cu no ta nacional di Europa y bishita Hulanda of otro estado Europeo. Sinembargo, diferencianan den tasa di aprobacion di visa te ainda ta persisti. Segun investigacion exclusivo, nacionalnan Africano cu aplica pa un visa di Schengen ta enfrenta rechaso 61% biaha den algun caso.

Ademas, e paspoortnan Hulandes ta ekipa cu seguridadnan avansa manera microtexto, hologram y paginanan di data di polycarbonaat. E chip biometrico ta warda data personal,garantisando cumplimento cu standardnan crea pa International Civil Aviation Organization (ICAO). E caracteristicanan aki ta haci cu e paspoort Hulandes ta un di e documentonan di biahe mas sigur cu tin globalmente.

Hulanda a mira un interes creciente den programanan pa di dos ciudadania, particularmente entre individuonan cu ta considera ‘high-net-worth’ cu ta buscando manera di diversifica nan opcionnan di mobilidad. Henley & Partners a mira un aumento den aplicacion pa ciudadania via inversion den 2024, cu Mericanonan den e lista mas grandi di solicitante.

Dr. Juerg Steffen, CEO di Henley & Partners, a splica cu “inversionistanan y famianan rico ta cada biaha adkiriendo mas opcion di ciudadania pa tin ora di enfrenta riesgonan politico of economico. Hulanda su paspoort su rango halto ta un opcion atractivo pa esnan cu ta busca mobilidad global.”