Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na November 2024 e prijs promedio pa bari di petroleo (US$ 69.60) a conoce un caida di US$ 2.88 (-4.0%) compara cu October 2024 (US$ 72.48).
E costo total di energia pa kWh pa un uso di electricidad te cu 500 kWh a baha cu Afl. 1.49 cen pa Kwh, di Afl. 35.80 cen pa kWh na October 2024 pa Afl. 34.31 cen pa kWh na November 2024.
E costo total di energia pa kWh pa un uso di entre 501 – 1000 kWh a baha cu Afl. 1.53 cen pa Kwh, di Afl. 36.84 cen pa kWh na October 2024 pa Afl. 35.31 cen pa kWh na November 2024.
E flat rate a keda Afl 12.50.
Consecuentemente e prijs promedio di electricidad pa vivienda a baha di Afl. 274.57 pa Afl. 263.67 (-4.0%) causando un efecto di -0.30 ppt riba e CPI, mientras cu e prijs promedio di awa pa vivienda a keda Afl. 168.73.
Adicionalmente, e costo total di energia pa kWh pa un uso di electricidad riba 1000 kWh a baha cu Afl. 2.02 cen pa Kwh, di Afl. 48.47 cen pa kWh na October 2024 pa Afl. 46.45 cen pa kWh na November 2024.
Prijs di gasolin a registra un subida di Afl. 3.50 cen (1.5%) na November 2024 y a causa un efecto di 0.07 ppt riba e CPI.
Prijs di diesel a registra un subida di Afl. 4.80 cen (2.4%) na November 2024 y a causa un efecto di 0.01 ppt riba e CPI.
Na November 2024, utilidad, gasolin y diesel como grupo, tawata tin un caida di prijs di 1.4% compara cu October 2024 y hunto tawata tin un influencia di -0.23 ppt riba e CPI, mientras cu e restante 404 bienes y servicio hunto, a conoce un subida di prijs di 0.3% y tawata tin efecto di 0.29 ppt riba e CPI.
