E Euro ta e segundo moneda mas grandi na mundo, pero recientemente nos ta wak hopi rason pa ta preocupa cu e stabilidad di e unidad aki. Si nos analisa e prijs di Oro den Euro, nos ta wak cu esaki ta na un nivel ultra-record. Tur esaki ta indica na mi persona cu tin mas problema ta wardando e zona Europeo economicamente.

Caos politico:

Nos por nota cu recientemente e paisnan mas importante di e zona Europeo, esta Alemania y Francia ambos ta den un estado di caos politico. Den ambos pais e gobierno a cay y eleccion ta na caminda. Ademas di esaki nos ta wak cu partidonan bastante radical ta hayando mas y mas oido y simpatia di votadornan.

E tendencianan socioeconomico aki ta e consecuencia hopi directo di “Stagflation”, esta ora cu inflacion ta mas halto cu crecemento economico. Desde e Pandemia COVID e poder di compra di esnan na Europa a cay bastante. Esaki ta crea un fundeshi perfecto pa partidonan cu nos lo considera “radical” riba e spectrum politico haya un steun mas grandi cerca votadornan.

Tur esaki ta causando un preocupacion grandi cerca inversionistanan internacional y nos por wak cu e interes riba e 10-jarig staatsobligaties di Francia ta hisando enormemente. Na aña 2012 e zona economico Europeo a conoce un crisis di debe dor cu paisnan manera Portugal y principalmente Grecia a cay den problema financiero. Esaki na e tempo ey a wordo resolvi dor cu e Banco Central Europeo (ECB) a cuminsa cumpra staatsobligaties pa baha e rente di tur e paisnan cu ta miembro di e zona economico.

Pero den contrast cu e temporada eynan Francia y Alemania ta wordo considera como “kernlanden” di e union. Na 2012 tawata mas facil pa resolve e problemanan temporalmente door cu Grecia y Portugal ta forma un parti relativamente chikito di e economia Europeo. Tambe nos no mester lubida cu 2 aña pasa un di e banconan mas grandi y renombra esta Credit Suisse a cay den otro.

E factor Trump:
 Un factor cu ta acelerando e caida di e Union Monetario cu ta e Euro, ta e binidero Presidencia di Donald Trump cu kier bin cu extra tarifanan riba tur producto importa cu ta drenta Estados Unidos. Como un region cu ta concentra su mes riba exportacion, e prospecto di tarifanan riba importacion lo por tin un impacto hopi negativo pa Europa. Aunke e fenomeno di Trump ta haciendo e dolor di cabez cerca e kader Europeo hopi mas grandi, esaki no ta e causa fundamental di e problemanan di e region.

Factornan cultural fundamental:

Riba su nivel mas basico y fundamental e problema di e zona Europeo ta uno socio-cultural. Unda e diferencia historico y financiero di paisnan nordico, esta por ehempel Hulanda, Alemania y Dinamarca versus esun di sur Europa cual ta Italia y Spaña ta demasiado grandi.

Pa casi 20 aña e paisnan manera Italia y Spaña no a tene nan mes na reglanan stipula den e “Tratado di Maastricht” pa tene deficitnan gubernamental bou 3% pa aña. Na otro banda e paisnan Nordico a laga esaki tuma lugar y awo “cu e baca a hoga” kier core grijp in. Cu ta encera medidanan Dragonico cual niun poblacion lo zomaar guli. E resultado na final ta un union instabil cu mas y mas votadornan local frustra.

Un advertencia pa Aruba:
 E ta hopi importante pa nota cu ora poder di compras di e mayoria grandi di un pueblo cay demasiado bou presion y pa mucho largo cu esaki ta traduci su mes den instabilidad socio-politico. Pa e motibo aki y pa aña largo ta enfocando cu mester usa tecnologia & innovacion combina cu medidanan mas universal pa garantisa poder di compras di pueblo di Aruba.

En berdad nos a wak un lista di aspectonan positivo, awo den mi opinion humilde, mester enfoca mas fuerte riba tur sorto di clase di innovacion pa asina baha costo di bida di pueblo prome cu esaki traduci su mes den instabilidad socio-politico.