Mediante un comunicado di prensa Gobernador di Aruba Su Excelencia Alfonso Boekhoudt a anuncia oficialmente Gerlien Croes y Mike Eman como formadornan di gobierno.

Manera ya caba ta conoci, prome cu aña a bolter, partido Futuro y partido AVP a firma un declaracion di boluntad pa forma siguiente gobierno. Den e relato final presenta pa e informador Tisa LaSorte a conclui cu e dos partido aki kier un coalicion den gobierno.

Den bista di e relato final di e informador, e declaracion di boluntad firma y e resultado di e investigacion hudicial y e investigacion di seguridad estatal riba ambos candidato-formador, Gobernador Boekhoudt a nombra Mike Eman y Gerlien Croes como formador diamars 14 di januari.

Gobernador a pidi nan pa forma un gabinete stabiel cu tin confiansa di e fraccionnan di AVP y FUTURO den Parlamento y cu ta consisti di personanan cu ta dispuesto y capaz pa implementa un maneho financiero-economico solido, cu atencion pa costo di bida na Aruba.

Parti di e encargo di formacion ta trahamento di un acuerdo di gobernacion entre AVP y FUTURO y un reparticion di cartera dentro di e gabinete nobo. Finalmente, e eligibilidad di candidatonan pa e funcion di minister y di minister plenipotenciario mester wordo evalua previamente a base di e exigencianan y proceduranan stipula den e “Landsverordening integriteit ministers”.

Mas tarda pa dia 18 di februari proximo e formadornan mester informa Gobernador Boekhoudt por escrito tocante nan conclusionnan. Mientras tanto e formadornan lo informa Gobernador verbalmente, of si ta necesario por escrito, tocante e progreso den implementacion di e encargo di formacion.

Despues e proceso ta continua y Gobernador ta huramenta formalmente e prome minister, vice-prome minister y otro ministernan cu lo sinta den Conseho di Minister. E gobierno recien forma ta asumi su cargo y cuminsa su termino.

Despues di formacion di gobierno, e prome minister y ministernan nobo ta presenta nan acuerdo di coalicion y politica na Parlamento.

Parlamento por debati y vota riba e programa proponi di gobierno, maske den practica, acuerdonan di coalicion ta generalmente acepta si nan tin sosten di mayoria.

Mester remarca cu nunca antes tabatin dos formador. E ta posibel y por sucede di e temanan ta amplio y complica cu ta rekeri mas experticio specifico. Awo cu Gobernador di Aruba nombra ambos lider di partido como formador di gobierno, esaki ta bira prome biaha den historia cu tin dos formador pa un proceso di formacion di gobierno.

Pa loke ta proceso di negociacion di formacion di gobierno entre partido Futuro y AVP, durante e huramentacion di e di 12 constelacion di Parlamento di Aruba dia 8 di januari ultimo, Bon Dia Aruba a combersa cu parlamentario di fraccion AVP Wendrick Cicilia ya puntra cone proceso y e negociacionnan aki ta andando.

Cicilia a remarca cu comunidad di Aruba ta sigui hopi di cerca e proceso di formacion cual proceso hopi importante. El a indica cu di parti di partido AVP nan ta hopi positivo y tin hopi fe cu esaki lo logra y a subraya cu partido AVP ta haciendo tur locual cu ta den nan alcance pa por logra un proximo gobierno.

E parlamentario hoben a resalta cu mirando e resultadonan electoral, e votonan y tambe con comunidad a vota nan ta interpreta esaki manera cu pais Aruba ta den expectativa di un gobierno di AVP-Futuro.

“Esey ta locual nos ta explorando y canalisando nos energia pa por formalisa esaki. E negociacionnan ta andando, e proceso ta andando y mi ta kere cu na e momentonan aki nos tur tin cu enfoca riba pais Aruba y locual cu ta beneficia pais Aruba. Mi ta kere cu esaki den mente como guia nos mester por yega na otro,” el a enfatisa.

Mas detaye di e proceso di formacion no ta conoci y comunidad di Aruba tin expectativa halto pa loke ta e formacion di e gobierno nobo aki.

Tur gabinete ta pretende di ta e inicio di algo unico, algo nobo nunca bisto. Y tin cierto señal cu por indica cu di berdad algo ta cambiando, of no. Esaki por ta riparabel na e eventual ripiticion di erornan di pasado, of un claro rechaso di continua cu esakinan.

Por ehemplo, kico ta haci cu e composicion final di e ministerionan? Ta conoci cu desde hopi aña caba den formacion di gobierno no ta tene cuenta mas cu cierto logica den e composicion di e ministerionan, aunke esey inicialmente, na 1986, tabata e pensamento formando e ministerionan segun cierto criterio relaciona cu e tareanan specifico cu nan tin, cu ta toca otro riba cierto tereno y por lo tanto tin cierto relevancia poniendo nan hunto.

Sin embargo, sigur den e caso di formacion di gobierno di coalicion, oportunismo politico a vence y a bira algo normal cu den formacion ‘tur opcion ta riba mesa’. E negociacion den e estilo aki en berdad ta contribui na e ‘flexibilidad’ na mesa pa por yega na un gabinete, pero mas cu un biaha ta surgi combinacion di cartera cu ta desafia logica completamente.

Otro aspecto cu lo mester tene cuenta cune ta e peso inaceptable cu e ministerio di asunto general a haya durante e ultimo gobierno. Apart di e carteranan cu na ultimo a bay pa e prome minister, pa motibo di retiro di otro ministro di su gabinete, el a encarga su mes cu e cartera di infrastructura y planificacion, aparentemente dunando e impresion cu no tabata prudente pa duna ningun hende mas un oportunidad pa por maneha e tentacionnan cu e cartera ey semper ta representa.