Ta haciendo algo… Cu corupcion ministerial…?

Nos por a tuma nota di e contesta amplio cu e secretario di estado Hulandes, responsable pa asunto di Reino, a duna riba un serie di pregunta den parlamento Hulandes encuanto corupcion gubernamental, y combatimento di esaki na e islanan autonomo den Caribe. E preguntanan tabata dirigi naturalmente riba kico e mandatario, for di su posicion di responsabilidad, tin pensa di haci. Manera por a spera, su contestanan a bin cu e contenido cu nos a yega di mira hopi biaha caba. Cu esaki nos no kier ta negativo, pero e situacion aki semper ta exigi di un mandatario pa anda cu cautela, pa no mishi cu e autonomia cu e gobiernonan local, y e aparato hudicial na cada isla tin den combati criminalidad, tambe esun dentro di e aparato gubernamental mes. Manera articulo 43 inciso 1 di Statuut ta bisa, “Cada pais ta percura pa realizacion di e derecho y libertadnan humano fundamental, seguridad hudicial y gobernacion adecuado.”

Di otro banda, y esey tambe a resalta den su contestanan, e ta consciente cu e ta responsable, segun inciso 2 di e mesun articulo, pa actua na nivel di Reino pa garantiza e mesun derecho y libertadnan, seguridad hudicial y bon gobernacion, menciona den e promer inciso di e articulo, y ripiti den di dos.

Pero, nos mester por supone cu e parlamentarionan Hulandes tambe ta na altura di e situacion ambivalente aki, unda rapidamente un secretario di estado ta hinca su mes den problema actuando demasiado liher. Di otro banda ta existi nan preocupacion pa e serie aparentemente interminable di mandatario na e islanan cu ta haya nan mes den problema cu husticia pasobra nan no sa e diferencia entre loke ta di nan y loke ta di otro. E pregunta di nan anto: kico ta haciendo concretamente pa preveni esaki?

E preocupacion ta di comprende, pero nos por mira e asunto di dos banda. Uno ta cu no ta normal cu asina hopi persona na e nivel halto aki ta keda descubri den e situacion di delincuencia aki. Esey nos tur por ta di acuerdo cune. E otro ta cu, en todo caso na Aruba, den e ultimo decada nos tabatin un serie grandi di mandatario cu a haya nan mes envolvi den delincuencia den nan funcion, pero e hecho innegable ta cu husticia a actua contra nan… Of nos ta bay kere cu ta pa puro casualidad Ministerio Publico a bin topa cu e casonan aki?

Nos mester reconoce anto cu algo a cambia y cu tur proximo ministro y funcionario halto ta bon adverti cu e cambio aki den ultimo añanan tin consecuencia pa esun cu kier purba su suerte ainda. Esnan cu den e añanan anterior tabata practica e mesun metodonan ey y nunca a yega den corte, a probecha di e relativo facilidad pa practica corupcion, pero esey a caba definitivamente.

Sin duda algun esey tin di haci cu e forma di colaboracion investigativo cu ta existi den Reino, entre e aparato hudicial na e islanan y esun di Hulanda. A base di e colaboracion ey nos a keda confronta cu un serie di funcionario halto bao investigacion. Bon trabao, pero ainda falta…

Loke falta ta hustamente e asunto unda e secretario di estado no por a bisa mas cu ta trahando den cuadro di e Landspakket cu e gobiernonan local pa logra esey. Esey ta e restructuracion di e procesonan administrativo, cu mester bay percura cu ta bira hopi mas dificil pa practica e corupcion cu nos tabatin decadas ta contemplando. Pero aki ta unda nos ta yega na un punto hopi sensitivo: ta sinta na mesa cu e potencial siguiente delincuentenan pa delibera con pa structura proceso administrativo, pa evita corupcion, no di e ambtenaar di menor rango so, sino tambe di esnan cu ta envolvi den e trabao preventivo na e nivel mas halto. Por conta cu nan colaboracion completo o ta un mal idea pa laga nan mira exactamente con e sistema ta funciona? Pues, kico mester haci? Inclui o no inclui esnan den e puestonan mas halto den e trabao confidencial aki? E contesta ta simple: mester inclui nan pasobra tur persona ta en principio di bon voluntad y integro, te dia proba lo contrario. Laga nan ta bon na altura, pasobra dia un di nan dicidi cu e ta bay usa su conocimento pa maldad, despues cu nan gar’e ta imposible pa e bisa cu el a cay den un trampa, sea pa ignorancia o inocencia… Esey lo ta un factor di peso den nan culpabilidad, cu un castigo mas pisa den e huicio.

Awor, nos por imagina cu tin hende ta pensa, pakico ta trece e asunto aki dilanti?

Esey ta pasobra nos a mira varios caso di mandatario delincuente cu ta pretende cu nan no tabata sa ta con e ‘asunto ta organiza’… Pero e motibo pa un castigo di varios aña ta pasobra bo tabata lidera un organizacion criminal, cu tabatin como meta gana placa (bruto) cu abusa di puesto y poder. Nos como ciudadano no por evita corupcion cu otro kier comete, unico cos cu nos por haci ta keda leu di cualkier intento di haya bo mes envolvi den corupcion, pagando pa algo cu mester tabata gratis, si bo tin derecho… Loke ta nos interes comun ta cu esnan cu ta dirigi gobernacion no ta esunnan cu ta hustamente organiza e corupcion, cu e consecuencia cu esun cu no ta paga, no ta haya nada… Por ta cu ta pesey ainda no a avanza tanto cu e reforma gubernamental pa preveni corupcion?